«Ինտեր ՌԱՕ»-ն ՀՀ կառավարության հետ միասին տենդերի արդյունքում կընտրի ՀԷՑ-ում աուդիտ անցկացնող ընկերությունը։ Այս մասին լրագրողներին հայտարարել է ընկերության ղեկավար Բորիս Կովալչուկը, գրում է ՏԱՍՍ-ը։
«Այժմ տենդեր կհայտարարվի եւ միջազգայնորեն ճանաչված մեծ քառյակից կընտրվեն ընկերությունները։ Որոշումը կկայացնենք մենք Հայաստանի իշխանությունների հետ միասին։ Նրանք անկախ աուդիտ կանցկացնեն, մենք դա միայն ողջունում ենք»,-ասել է նա։
Կովալչուկի խոսքով՝ աուդիտը կարող է տեւել մոտավորապես 3 ամիս։ Հետագայում ընկերությունը չի բացառում ակտիվի վաճառքը։ «Մենք պատրաստ ենք վաճառել ցանկացած ակտիվ, եթե լավ գին առաջարկեն։ Ինչպես նաեւ պատրաստ ենք գնել ցանկացած ակտիվ, եթե գինը մեզ ձեռնտու լինի։ Այստեղ ցանկացած տարբերակ հնարավոր է»,- պարզաբանել է նա։
ՌԴ էներգետիկայի նախարար Ալեքսանդր Նովակը նույնպես հույս ունի, որ ՀՀ ՀԾԿՀ-ն ՀԷՑ-ի սակագների հարցում աուդիտի ավարտին ճիշտ որոշում կկայացնի։ ՏԱՍՍ-ին տված հարցազրույցում նա նշել է, որ աուդիտ անցկացնելը նորմալ երեւույթ է, քանի որ ամեն դեպքում սակագինը կարգավորվում է պետության մակարդակով։
