ՀՀ հանրային ծառայությունները կարգավորող հանձնաժողովն այսօր՝ հուլիսի 7-ին, իր նիստում քննարկել է«Երևան Ջուր» ընկերության կողմից սպառողներին խմելու ջրի մատակարարման, ջրահեռացման և կեղտաջրերի մաքրման ծառայությունների մատուց-ման սակագների սահմանման մասին հարցը եւ անփոփոխ թողել սակագինը:
ՀԾԿՀ համապատասխան որոշման մեջ նշված է.
«Քննարկելով վերը նշված հարցը, հիմք ընդունելով Հայաստանի Հանրապետության ջրային օրենսգրքի 14-րդ, 79-րդ, 79.1-րդ հոդվածները և հաշվի առնելով «Երևան Ջուր» փակ բաժնետիրական ընկերության 2015 թվականի հունիսի 29-ի №ԳԳ/4820 գրությունը, Հայաստանի Հանրապետության հանրային ծառայությունները կարգավորող հանձնաժողովը որոշել է` վերահաստատել սպառողներին խմելու ջրի մատակարարման, ջրահեռացման և կեղտաջրերի մաքրման ծառայությունների մատուց-ման գործող գումարային սակագինը` 170,256 դրամ/խմ (ներառյալ ավելացված արժեքի հարկը)։
Ընդունված որոշումն ուժի մեջ կմտնի 2015 թվականի օգոստոսի 9-ից»:
Ավելի վաղ NEWS.am-ը հայտնել էր, որ «Երեւան ջուր» ընկերությունը որոշել է հրաժարվել ջրի սակագինը բարձրացնելու իր մտադրությունից եւ այդ մասին գրություն է ուղարկել Հանրային ծառայությունները կարգավորող հանձնաժողովին:
Մասնավորապես, ՀԾԿՀ-ին ուղղված գրության մեջ ասվում էր.
«Երեւանի ջրամատակարարման եւ ջրահեռացման համակարգերի «Վարձակալության պայմանագրի» իրականացման 9 տարիների (2006-2015 թթ.) ընթացքում «Երեւան ջուր» ՓԲԸ-ն համակարգի շահագործման արդյունավետության բարձրացմանն ուղղված իր հետեւողական աշխատանքի եւ անընդհատ իրականացվող նախաձեռնությունների շնորհիվ կարողացել է համակարգում էլեկտրաէներգիայի ծախսը նվազեցնել ավելի քան 81 տոկոսով, որը սպառողներին խմելու ջրի մատակարարաման, ջրահեռացման եւ կեղտաջրերի մաքրման ծառայություններիմատուցման սակագների ճշգրտման հաշվարկում էական գործոն է: Հաշվի առնելով այս հանգամանքը` ընկերությունն առաջարկում է անփոփոխ թողնել սակագինը»:
