«Նաիրիտ» գործարանի պարտքերի պատճառն այն է, որ 2007-2010թթ. գործարանը իր հիմնական արտադրանքը՝ քլորոպրենային կաուչուկը, վաճառում էր ինքնարժեքից ցածր գնով։ Այս մասին հուլիսի 28-ինկայացած խորհրդարանական լսումների ժամանակ հայտարարեց ՀՀ էներգետիկայի եւ բնական պաշարների նախարար Երվանդ Զախարյանը։

Նրա խոսքով՝ 2007թ. մեկ տոննա կաուչուկի միջին ինքնարժեքը կազմում էր 3.7 հազար դոլար, 2008թ.՝ 4.6 հազար, 2009թ.՝ արդեն 6 հազար։ Իսկ վաճառվում էր այդ կաուչուկը 3-3.5 հազար դոլարով։ Այսինքն՝ «Նաիրիտը» տարիներ շարունակ աշխատում էր գրեթե կրկնակի վնասով։ Դրա հետեւանքով 2007-2010թթ. նախկինում «մաքուր» գործարանը 50 միլիարդի «պոչ» հավաքեց։

«Նման պայմաններում արտադրությունը շարունակելը հավասարազոր էր ինքնասպանության։ Սակայն սեփականատերը շարունակել է արտադրությունը՝ վարկեր վերցնելով եւ պարտքեր հավաքելով։ Դրանով էլ նա կործանեց ինքն իրեն եւ լուրջ խնդիրներ ստեղծեց մի շարք էներգետիկ ընկերությունների համար»,- նշեց նախարարը։