Բոլոր նաիրիտցիները մինչեւ հուլիսի 31-ը կստանան իրենց աշխատավարձերը: Այս մասին NEWS.am-ի թղթակցին ասաց ԱԺ տնտեսական հարցերի մշտական հանձնաժողովի նախագահ Վարդան Այվազյանը:
«Մինչեւ այս ամսվա վերջ ստանալու իրենց գումարները, վստահեցնում եմ: Ինչ վերաբերվում է գործարանի վերագործարկմանը, ապա ոչինչ ասել չեմ կարող»,- ասաց Այվազյանը:
Նշենք, որ նաիրիտցիներն արդեն մի քանի օր է՝ սկսել են ստանալ իրենց աշխատավարձերը: Հուլիսի 28-ի դրությամբ 400 աշխատակից ամբողջությամբ ստացել է գումարը: Աշխատավարձը հատկացնում է պետությունը՝ էներգետիկայի ոլորտի պետական ընկերությունների շահույթի հաշվին:
Հիշեցնենք, որ «Նաիրիտի» աշխատակիցների աշխատավարձի գծով պարտքը կազմում է 5,3 մլրդ դրամ: Նաիրիտցիները բազմիցս բողոքի ակցիաներ են կազմակերպել կառավարության ու նախագահի նստավայրի մոտ՝ պահանջելով լուծում տալ իրենց խնդրին: Ձեռնարկությունը չի գործում 2010 թվականի ապրիլից:
