Համաշխարհային բանկի ներկայացուցիչների արած փորձագիտական եզրակացության համաձայն «Նաիրիտ» գործարանը պետք է փակել, այդ պատճառով պատգամավորները հրաժարվեցին լսել նրանց: Այս մասին այսօր՝ հուլիսի 28-ին, խորհրդարանում «Նաիրիտի» հարցով հրավիրված հանդիպման ժամանակ NEWS.am-ի թղթակցին ասաց ԱԺ ՀՀԿ-ական պատգամավոր Սամվել Ֆարմանյանը, որը նույնպես դեմ քվեարկեց ՀԲ ներկայացուցիչների ելույթին:

«Համաշխարհային բանկի փորձագետների խոսքով՝ «Նաիրիտը» պետք է փակել, իսկ մենք դեմ ենք դրան, կառավարությունը նույնպես դեմ է: Մենք չենք ուզում, որ տպավորություն ստեղծվի, թե պատգամավորները հավաքվել են, որ ասեն՝ գործարանը փակեք: Մինչդեռ կարծում ենք՝ մենք ամեն կերպ միջոցներ պետք է գտնենք «Նաիրիտի» վերագործարկման համար»,- ասաց ՀՀԿ-ական պատգամավորը:

Նշենք, որ խորհրդարանում հրավիրված հանդիպման ժամանակ Համաշխարհային բանկի ներկայացուցիչները հրաժարվեցին աուդիտի արդյունքները ներկայացնել լրատվամիջոցների ներկայությամբ: Պատգամավորներն էլ իրենց հերթին հրաժարվեցին լսել բանկի փորձագետներին:

Հիշեցնենք, որ 2006թ. պետությունը «Նաիրիտ»-ի բաժնեմասերի 90%-ը 40 մլն դոլարով վաճառել էր բրիտանական Rhinoville Property Limited կոնսորցիումին։ ԱՊՀ Միջպետական բանկը 2006թ.-ին Rhinoville Property Limited ընկերության համար 70 միլիոն դոլարի բանկային գիծ էր բացել, որը ընկերությունը չէր փակել։ Մոսկվայի արբիտրաժային դատարանը 2014թ. հունվարին բավարարել էր Միջպետական բանկի մասին հայցը` հայկական «Նաիրիտ» գործարանի սեփականատիրոջից պարտքեր դիմաց 90% բաժնեմասերը բռնագրավելու հայցը։ Մնացած 10%-ը պատկանում է Հայաստանի կառավարությանը։