«Շենգավիթ» բժշկական կենտրոնից հուլիսի 27-ին «Էրեբունի» ԲԿ տեղափոխված եւ երկու օր անց մահացած 26-ամյա Մերի Մարգարյանի նորածին դուստրն այսօր՝ հուլիսի 30-ին, ժամը 12:20-ի սահմաններում հիվանդանոցում մահացել է: Այս մասին NEWS.am-ի թղթակցին հայտնեցին «Էրեբունի» բժշկական կենտրոնից:

Նշենք, որ փոքրիկը գտնվում էր ծայրահեղ ծանր վիճակում: Նա ոչ մի բանի չի արձագանքում, ի սկզբանե միացված է եղել արհեստական շնչառության ապարատին։

Ավելի վաղ հայտնել էինք, որ Երեւանի «Էրեբունի» բժշկական կենտրոնում 2015թ. հուլիսի 29-ին 26-ամյա ծննդկան է մահացել, որին երկու օր առաջ տեղափոխել էին «Շենգավիթ» բժշկական կենտրոնից: Հիվանդանոցից փոխանցել են, որ ծննդկանին՝ Մերի Մարգարյանին, կեսարյան հատում են արել, վիճակը ծայրահեղ ծանր է եղել, 2 օր անց նա մահացել է: Մեր տեղեկություններով՝ ծննդկանը մի քանի օր շարունակ ջերմություն է ունեցել, սակայն «Շենգավիթ» ԲԿ-ից միայն ջերմիջեցնող են նշանակել եւ տուն ուղարկել։

Փաստի առթիվ նյութեր են նախապատրաստվում։ Նշանակվել է դատաբժշկական փորձաքննություն։