«Արմավիր» բժշկական կենտրոնում հունիսի 16-ին մահացած ջրաշենցի 4-ամյա Կարինե Հովհաննիսյանի տանն օգտագործված սննդամթերքում չեն հայտնաբերվել այն ինֆեկցիայի բացիլները, որոնցից, ըստ դատաբժշկական փորձաքննության, երեխան մահացել է: Այս մասին NEWS.am-ին ասաց երեխայի իրավահաջորդի ներկայացուցիչ, իրավապաշտպան Արթուր Սաքունցը:
«Դատասննդաբանական փորձաքննության եզրակացությունն ենք ստացել: Հետազոտվել է փոքրիկի տան այդ օրվա կաթնամթերքը, մսի խորովածը, մյուս ուտելիքները: Այն ինֆեկցիայի բացիլները, որից իբր մահացել է երեխան, սննդի մեջ չեն հայտնաբերվել»,- ասաց Արթուր Սաքունցը՝ նշելով, որ իրենք պահանջել են համալիր դատաբժշկական փորձաքննությումբ պարզել նաեւ, թե որտեղից է առաջացել ինֆեկցիան, որից երեխան մահացել է:
Ինչպես NEWS.am-ի հետ զրույցում նշեց երեխայի տատիկը՝ Կարինե Հովհաննիսյանը, իրենք պայքարելու ենք այնքան ժամանակ, մինչեւ երեխայի մահվան իրական պատճառը բացահայտվի: Մահվան մեջ «Արմավիր» ԲԿ ինֆեկցիոն բաժանմունքի պետ Անահիտ Պետրոսյանին մեղադրող հարազատները շարունակում են պնդել, որ բացառվում է՝ երեխան ինֆեկցիոն տոքսիկ շոկից մահանար:
«Ես անձամբ եմ լսել, որ վերակենդանացման բաժնի բժիշկը բժշկուհուն ասաց՝ ես ի՞նչ անեմ, երեխան մահացել է, ամբողջ թոքերը ջրի մեջ ա: Բժիշկն ինձ էլ ասեց, որ թոքերը ջրի մեջ են, երբ որ ես թեքվեցի, իրեն ասացի՝ մի բան արեք, փրկեք երեխուն»,- ասաց տիկին Կարինեն:
Նշենք, որ ըստ դատաբժշկական փորձաքննության՝ երեխան մահացել է ինֆեկցիոն տոքսիկ շոկից, որը հետեւանք է սուր աղիքային «Սալմոնելլիոզային եւ Ստաֆիլոկոկկային» ինֆեկցիայի, որը մահվան պատճառի հետ ուղղակի պատճառական կապի մեջ է գտնվում:
Նշենք, որ ըստ երեխայի տատիկի, որը մահվան պահին ու դրանից առաջ երեխայի կողքին է եղել, փոքրիկին մահվանից մոտ տասը րոպե առաջ բժշկուհու հսկողությամբ ստամոքսի լվացում են արել, սակայն օրգանիզմից ջուրը դուրս չէր եկել: Հարազատները ենթադրում են, որ ջուրը երեխայի թոքերն է լցվել ստամոքսի փոխարեն:
Բժշկուհին երեխայի մահվան մեջ իր մեղքը չի տեսնում:
Հիշեցնենք, որ երեխան Արմավիրի բժշկական կենտրոնի ինֆեկցիոն բաժանմունք էր ընդունվել հունիսի 16-ի կեսօրին՝ ջերմություն, թուլություն, փսխում, լուծ ախտանշաններով: Վիճակը գնահատվել էր միջին ծանրության` սուր աղիքային ինֆեկցիա նախնական ախտորոշումով։ Երեկոյան փոքրիկի վիճակը կտրուկ վատացել էր։ Նրան տեղափոխել էին վերակենդանացման բաժանմունք, սակայն կյանքը փրկել չէր հաջողվել:
