ԱԻՄ առաջնորդ Պարույր Հայրիկյանի եւ Սահմանադրական բարեփոխումների մասնագիտական հանձնաժողովի անդամների հանդիպումն այսօր՝ հուլիսի 31-ին, հետաձգվեց մեկ շաբաթով:
Լրագրողների հետ զրույցում Պարույր Հայրիկյանը նշեց, որ հանդիպման չկայանալու մասին իմացել է երեկ երեկոյան հեռախոսազանգով: Սահմանադրական դատարանից Հայրիկյանին հայտնել են, որ Վենետիկի հանձնաժողովը նոր փաթեթ է ուղարկել, որն էլ հանձնաժողովի բոլոր անդամներն այս պահին քննարկում են:
ԱԻՄ առաջնորդի խոսքով՝ մասնագիտական հանձնաժողովի անդամների մոտ տագնապ է առաջացրել այն փաստը, որ քննարկումը լրագրողների ներկայությամբ պետք է լիներ:
«Այս անգամ խուսափեցին քննարկումից, քանի որ իրական հնարավորություն էր ստեղծվել հանրային քննարկման համար: Լրագրողների միջոցով հանրությունը կտեղեկանար, որ մեր փաթեթի նկատմամբ առարկություններ ներկայացնելն անհնար է: Դրա համար սարսափեցին»,- ասաց Պարույր Հայրիկյանը:
Նշենք, որ հուլիսի 30-ին ԱԻՄ առաջնորդ Պարույր Հայրիկյանը երթ էր նախատեսել դեպի Սահմանադրական դատարան՝ պահանջելով, որ Սահմանադրական բարեփոխումների մասնագիտական հանձնաժողովը հաշվի առնի նաեւ իրենց կուսակցության ներկայացրած փաթեթները: Մինչեւ երթի սկսվելը՝ հանձնաժողովից Հայրիկյանին հաջորդ օրը հրավիրել էին քննարկումների, որին վերջինս համաձայնվել էր: