Ոստիկանությունը նոր մանրամասներ է հաղորդել հուլիսի 26-ին Ալավերդիում տեղի ունեցած սպանության մասին, երբ ամուսինը խանդի հողի վրա դանակով մահացու հարվածներ էր հասցրել կնոջը:
Ըստ ոստիկանության լրատվական ծառայության, կնոջ սպանության մեջ մեղադրվող Սամվել Ստեփանյանը տվել է խոստովանական ցուցմունք:
««Ռուսաստանում աշխատում էի, պրոբլեմներ ունի, պարտքեր ունեի, հետո իմացա՝ կինս ինձ դավաճանում ա, բայց չէի հավատում, 16 տարի սիրում էի իրան... Բայց դանակը նախօրոք էի պատրաստել, եկա ու տարբեր տեղին խփեցի»,- դեպքի մանրամասները ներկայացրել է Սամվել Ստեփանյանը:
Ավելի վաղ Քննչական կոմիտեի մամուլի ծառայությունը հայտնել էր, որ 2015թ. հուլիսի 26-ին վաղ առավոտյան ահազանգ է ստացվել, որ Ալավերդի քաղաքի իր բնակարանում հայտնաբերվել է Ս.Կոնյանի դին: Նույն օրը՝ ժամը 09:05-ին, ներկայացել է Սամվել Ստեփանյանն ու հայտարարել, որ նշված բնակարանում ինքն է կնոջը դանակով հարվածներ հասցրել՝ իրեն դավաճանելու համար:
Սամվել Ստեփանյանին մեղադրանք է առաջադրվել Քրեական օրենսգրքի 104-րդ հոդվածի 1-ին մասով: Նախաքննությունը շարունակվում է:
