Վրաստանի ներքին գործերի նախկին փոխնախարար Լեւան Գվազավան փորձել է ինքնասպան լինել, պնդում են հարազատները։ Նրանք չեն բացառում նաեւ նրա վրա հարձակվելու տարբերակը։ Նրանց խոսքով՝ Գվազավան փորձել է ինքնասպան լինել այն բանից հետո, երբ իր ատրճանակից արձակած պատահակամ կրակոցից զոհվել էր զարմիկ Ռեզո Քալոմլեցավին։

Հարազատների պնդմամբ՝ մեքենայի մեջ Գվազավան դուրս էր քաշել ատրճանակը, որը պատահաբար կրակել էր, եւ փամփուշտը կպել էր առջեւի նստատեղին նստած Ռեզո Քալոմլեցավիին, որը եւ տեղում մահացել էր։ Հենց այդ զենքով էլ Լեւանը փորձել է ինքնասպան լինել, փոխանցում է «Գրուզիա Օնլայն»-ը։

Գվազավան ծանր վիճակում տեղափոխվել է վերակենդանացման բաժանմունք։

Հիշեցնենք, որ ավելի վաղ հաղորդվում էր, որ Լեւան Գվազավայի վրա հարձակում են կազմակերպել, եւ նա գլխից վիրավոր է։