«Բարգավաճ Հայաստան» կուսակցության դիրքորոշումը սահմանադրական փոփոխությունների վերաբերյալ առանձնապես չպետք է տարբերվեր իշխող ՀՀԿ-ի դիրքորոշումից, նրանց գնացքը վաղուց գնացել է: Այս մասին NEWS.am-ի թղթակցի հետ զրույցում նշել է Կովկասի ինստիտուտի փոխտնօրեն, քաղաքագետ Սերգեյ Մինասյանը:
Նրա խոսքով, այս տարվա փետրվարին տեղի ունեցած իրադարձություններից հետո հարցը, թե արդյոք ԲՀԿ-ն ցանկանում է իրական ընդդիմություն դառնալ, վերջնականապես փակվել է: «Այս ընթացքում առանձնապես բան չի փոխվել, բացի այն, որ ԲՀԿ-ն որոշակիորեն ակտիվացել է քաղաքական դաշտում, ընդ որում ավելի ու ավելի իշխանամետ համատեքստում»,-ընդգծել է Մինասյանը:
Հիշեցնենք, որ ԲՀԿ-ն որոշել է խորհրդարանում կողմ քվեարկել սահմանադրական փոփոխությունների նախագիծը համընդհանուր հանրքավեի դնելու որոշմանը եւ միանալ «այո»-ի քարոզարշավին: Ավել վաղ, սակայն, ԲՀԿ-ն կտրականապես դեմ էր հանդես գալիս սահմանադրական փոփոխություններին՝ դա գնահատելով որպես իշխանության վերարտադրության փորձ:
