Արարատի մարզի խաղողագործներին, որոնք այսօր՝ հոկտեմբերի 5-ին փակել էին Երեւան-Մեղրի մայրուղին, հաջողվել է մթերել խաղողի բերքը, որը մի քանի օր է՝ Արարատի գինու գործարանի մոտ՝ բեռնատարների մեջ էր:
Խաղողագործներից Էդիկ Խաչատրյանը NEWS.am-ին ասաց, որ մարզպետի հետ հանդիպելուց եւ մայրուղին բացելուց հետո մարզ է գնացել նաեւ գյուղնախարար Սերգո Կարապետյանը, հանդիպել Արարատի գինու գործարանի տնօրինության հետ, որն առավոտյան հրաժարվել էր մթերել մի քանի օր իրենց հերթին սպասող գյուղացիների խաղողի բերքը:
Գործարանի տնօրինությունը համաձայնել է մթերել միայն հերթի մեջ սպասող՝ մոտ 50 խաղողագործների բերքը:
«Մարդիկ կան՝ արդեն հինգ օր է՝ կանգնած են գործարանի մոտ, բերքը փչացել է, թթվել է: Հիմա էլ դրա համար ամեն երրորդինը չեն ընդունում: Պիտի տանի, թափի բերքը, ուրիշ բան չի մնացել»,- ասաց Էդիկ Խաչատրյանը:
Խաղողագործներին հաջողվել է զրուցել նաեւ գյուղնախարարի հետ, որը նրանց հորդորել է առաջիկա մի քանի օրերին խաղողի բերք չհավաքել:
«Գյուղնախարարն ասեց՝ մի քաղեք, մինչեւ տենանք՝ ինչ ա լինում: Բայց էլ ի՞նչ լինի, արդեն ցրտահարություն ա սպասվում: Գյուղնախարարին չենք հավատում»,- ասաց խաղողագործը՝ նշելով, որ առանց այն էլ՝ իր եւ շատերի բերքի մի մասը փչացել է այս գիշեր տեղացած կարկուտից:
Էդիկ Խաչատրյանը նշեց, որ այս պահին իրենց տարածաշրջանում միայն Շահումյան գյուղի գինու գործարանում են մթերում խաղողը, այն էլ՝ 80, անգամ 50 դրամով: Նրա խոսքով՝ գյուղացիներից շատերն էլ դեռ 13-15 տոննա խաղող ունեն, որ մթերման խնդրի պատճառով չեն հավաքել:
Նշենք, որ Արարատի մարզում վերջին շրջանում գյուղացիները պարբերաբար խաղողով լցված բեռնատարներով փակում են մայրուղին՝ պահանջելով մթերել իրենց խաղողի բերքը: Մեկ անգամ նրանց է հանդիպել նաեւ վարչապետը, որը խոստացել է լուծում տալ խնդրին: Գյուղացիները հանդիպման օրը կարողացել են մթերել բերքը, սակայն հաշված օրեր անց նորից նույն խնդրի առջեւ են կանգնել:
