Թաիլանդի Փհուքեթ կղզում երկօրյա անկարգությունների պատճառով վիրավորվել է 14 ոստիկան։ Այս մասին հայտնում է Թաիլանդի 3-րդ ազգային հեռուստաալիքը, փոխանցում է «ՌԻԱ Նովոստի»-ն։

Ըստ առկա տեղեկությունների՝ հրդեհվել է 2 ոստիկանական եւ մի քանի այլ մեքենա։ Անկարգությունները սկսվել էին շաբաթ օրը երեկոյան՝ այն բանից հետո, երբ ոստիկանները Թհալանգի ոստիկանական տեղամասի մոտ մեքենայի տակ էին գցել 22 եւ 17 տարեկան երկու երիտասարդի, որոնք տեղում մահացել էին։

Շաբաթ ուշ երեկոյան ոստիկանական տեղամասի մոտ ավելի քան 300 մարդ էր հավաքվել։ Նրանք պահանջում էին իրենց հանձնել վթարի մեղավորներին։ Երբ տեղամասի պետը հրաժարվել էր նրանց հանձնել մեղավորներին, ոստիկանության տեղամասի վրա շշեր եւ պայթունավտանգ նյութեր էին նետել։ Ոստիկանները կրակ էին արձակել, սակայն ցուցարարները չէին ցրվել։

Գիշերը ոստիկանական տեղամասը շրջափակել էին զինվորականները։ Ցամաքային զորքերի 41-րդ դիվիզիայի հրամանատար գեներալ-մայոր Թհինչաթ Չինդագենը բանակցություններ էր վարել ցուցարարների առաջնորդի հետ։ Գեներալը խոստացել էր ոստիկանության հետ համատեղ հետաքննություն անցկացնել եւ 30-օրյա ժամկետում զոհերի հարազատներին տրամադրել արդյունքները։ Դրանից հետո ամբոխը ցրվել էր։