Սեւիլիական «Վերածնունդ» հրատարակչությունը վերահրատարակել է իսպանացի հայտնի գրող եւ լրագրող Խուլիո Կամբայի երկու ակնարկները, որոնց նա, այլ թեմաներից բացի, անդրադարձել է նաեւ Հայոց ցեղասպանության իրողությանը: Այս մասին գրում է La Vanguardia-ն:
Իսպանական գրականության Արծաթե դարի ժամանակաշրջանի մասնագետ Խոսե Միգել Գոնսալես Սորիանոյի խոսքով, դաժանությունը, որով իրականացվել է Ցեղասպանությունը, ցնցել է Կամբային:
Իր նյութերում գրողը թուրքերին մեղադրում է այն բանում, որ նրանք պարծենում էին, թե «ինչպես կարողացան ցնցել աշխարհը այն ժամանակ, երբ թվում էր, թե մարդկության զգայնությունը հատել է եւ արդեն հնարավոր չէ բարբարոսության նոր ձեւեր հնարել»:
Ամենից շատ Կամբային ապշեցրել է հայերի վերաբերմունքը կանանց եւ երեխաների հանդեպ: Այդ առիթով նա գրել է. «Թուրքերը նոր զբաղմունք գտան՝ ծնողների եւ ամուսինների առջեւ հայ կանանց ու աղջիկների բռնաբարությունը»:
Խոսե Միգել Գոնսալես Սորիանոյի խոսքով, գրողն իր ակնարկներում Իսպանիային խնդրել է թեթեւացնել «այն հայերի ճակատագիրը, որոնք կարողացել են ողջ մնալ այդ սարսափելի հետապնդումների ժամանակ»:
