![](img/news/29/07/85/default.jpg)
Վերակառուցման եւ զարգազման եվրոպական բանկի (ՎԶԵԲ) Հայաստանում ՓՄՁ-ների ֆինանսավորման ու զարգացման Խումբը եւ ԵՄ-ն նախաձեռնել են «Ֆինանսական ներդրումների նախապատրաստում» թեմայով արդեն երկրորդ հատուկ մշակված դասընթացը, որի նպատակը ՓՄՁ-ների ֆինանսական մատչելիության խնդրի լուծմանը նպաստելն է, նրանց մրցունակ ու զարգացած դարձնելը: Այս մասին նշվել է այսօր՝ հոկտեմբերի 14-ին, ԵՄ-ի եւ ՎԶԵԲ-ի կողմից տեղական փոքր եւ միջին ձեռնարկությունների աջակցությանն ուղղված ծրագրերին նվիրված քննարկման ժամանակ:
Այս նախաձեռնությունը կրկին հնարավոր դարձավ Եվրոպական Միության շնորհիվ, որը ՎԶԵԲ-ի` Հայաստանում մասնավոր հատվածի կայուն զարգազմանն ուղղված խորհրդատվական գործունեության հիմնական դոնորն է, ինչը հնարավորություն է տալիս լավագույն միջազգային փորձը եւ նոու-հաուն ներդնել տեղական ՓՄՁ-ներին աջակցելու համար:
«Ֆինանսական ներդրումների նախապատրաստում» դասընթացի հիմնական նպատակն է մեծացնել տեղական խորհրդատվական ծառայությունների հանդեպ պահանջարկը ձեռնարկություններին ֆինանսական ներդրումների ներգրավման տարբեր փուլերին նախապատրաստելու եւ միավորման գործընթացում ֆինանսավորման ներգրամվան արդյունքում բաժնետիրական արժեքն ավելացնելու նպատակով: Դասընթացը կնպաստի տեղական խորհրդատուներին նորագույն ֆինանսական գործիքների վերաբերյալ գիտելիքների փոխանցմանը:
«Այսօր բազմաթիվ ժամանակակից բիզնես գործընթացներ, ինչպիսիք, օրինակ, կորպորատիվ կառավարումը, թափանցիկությունը, սոցիալ-բնապահպանական քաղաքականությունը եւ ներդրողների հետ հարաբերություններն են, փոքր կապիտալի, այդ թվում նաեւ «մեզոնինային» եւ բաժնային կապիտալում ներդրումների ներգրավման հիմնական բանալին են: Իսկ այնպիսի շուկայական գործիքներ, ինչպիսիք են պարտատոմսերն ու գրանցված սեփականությունը, կարող են ներգրավել ձեռնարկության աճի եւ բարգավաճման համար անհրաժեշտ վճռորոշ երկարաժամկետ կապիտալ», - նշեց ՎԶԵԲ-ի Երեւանյան գրասենյակի ղեկավար Մարկ Դեւիսը:
Հաշվի առնելով համագործակցության դրական նախորդ փորձը՝ ՎԶԵԲ-ը ԵՄ-ի ՓՄՁ-ների զարգացմանն ուղղված նախաձեռնության շրջանակում այս անգամ եւս հրավիրեց Գեւին Ռայանին վարելու հատուկ տեղական խորհրդատուների համար մշակված «Ֆինանսական ներդրումների նախապատրաստում» դասընթացը:
Գեւին Ռայանը, ով 25 - ամյա փորձ ունեցող ֆինանսական արդյունաբերության եւ մասնավոր կապիտալի ներդրման ոլորտներում մասնագիտացած միջազգային փորձագետ է, կկիսվի ՓՄՁ-ների ներդրումային հնարավորությունների կանխորոշման իր փորձով, ինչը կօգնի վերջիններիս զարգանալ եւ դառնալ տեղական տնտեսության իրական խթանիչներ:
Պարոն Ռայանի՝ որպես ներդրումային բանկիրի փայլուն փորձը, որը նա ձեռք է բերել Լոնդոնի ու Տոկիոյի Normura Securities-ում, այնուհետեւ HSBC ներդրումային բանկում, ինչպես նաեւ Soros Investment Management-ում նրա՝ որպես մասնավոր կապիտալի ֆոնդի կառավարիչ աշխատանքի ընթացքում ձեռք բերած գիտելիքները թույլ կտան ՓՄՁ-ներին ստանալ լավագույն պրակտիկ գիտելիքներ եւ հմտություններ, ծանոթանալ ներդրողների ներգրավման ավելի բարդ գործիքների կիրառման հնարավորություններին:
Խոսելով դասընթացի մասին՝ Գեւին Ռայանը նշեց, որ այն առավելապես գործնական է, հիմնված Կենտրոնական եւ Արեւելյան Եվրոպայի երկրների համապատասխան փորձի եւ դեպքերի վրա:
«Մենք նպատակ ունենք ՓՄՁ-ներին եւ նրանց խորհրդատուներին զինել իրենց աճի համար անհրաժեշտ ֆինանսական ռեսուրսներ ներգրավելու համապատասխան հմտություններով: Դա մենք կանենք՝ ուսումնասիրելով շուկայում առկա բաժնետիրական կամ քվազի-բաժնետիրական արտադրանքը եւ դիտարկելով այն դրական գործողությունները, որ ՓՄՁ-ն կարող է ձեռնարկել իրեն դիրքավորելու, որպես կորպորատիվ կառավարման արդիականացում եւ լավ բիզնես պլանավորում ունեցողի», - հավելեց Գ. Ռայանը:
«Սա ՎԶԵԲ-ի կողմից Հայաստանյան խորհրդատուներին առաջարկվող եւս մեկ ֆինանսների անհրաժեշտ եւ պահանջված դասընթաց է: Մենք՝ Փոքր եւ Միջին Բիզնեսի Ֆինանսավորման եւ Աջակցության Խումբը, շարունակում ենք մեր ջանքերն ուղղել տեղական խորհրդատվական դաշտի ամրապնդմանն ու Հայաստանյան ՓՄՁ-ներին ֆինանսավորման ներգրավման համար անհրաժեշտ գործիքների տրամադրմանը», - ասաց ՎԶԵԲ-ի Փոքր Բիզնեսի Աջակցության Խմբի Ազգային Ծրագրի ղեկավար Տիգրան Աղաբեկյանը:
Դասընթացը տեղի կունենա Երեւանում հոկտեմբերի 15-ին եւ 16-ին:
Նշենք, որ 2003 թվականից ի վեր ավելի քան 5,3 միլիոն եվրո ֆինանսավորում է տրամադրվել Հայաստանում ՓՄՁ-ների համար ՎԶԵԲ-ի խորհրդատվական ծրագրերին եւ շուկայի զարգացմանն ուղղված գործառնություններին: ՎԶԵԲ-ն, որը պատկանում է 64 պետությունների եւ երկու միջպետական կազմակերպությունների, աջակցում է շուկայական տնտեսության եւ ժողովրդավարության զարգացմանը: ՎԶԵԲ-ին կարող եք հետեւել բանկի պաշտոնական կայքի, ինչպես նաեւ Facebook-ի եւ Twitter-ի էջերի միջոցով: