![](img/news/29/07/89/default.jpg)
ՎԶԵԲ-ը շեշտադրումն անում է տեղական արժույթով ներդրումների վրա, որովհետեւ չափից շատ ավանդներ եւ վարկավորում տեղի է ունենում արտարժույթով, իսկ դա մեծապես ազդում է վարկ վերցրած ձեռնարկությունների վիճակի վրա եւ ավելացնում վարկավորման ռիսկերը: Այս մասին, այսօր՝ հոկտեմբերի 14-ին, ԵՄ-ի եւ ՎԶԵԲ-ի կողմից տեղական փոքր եւ միջին ձեռնարկությունների աջակցությանն ուղղված ծրագրերին նվիրված քննարկումից հետո, լրագրողների հետ զրույցում նշեց Հայաստանում Վերակառուցման եւ զարգացման եվրոպական բանկի գրասենյակի ղեկավար Մարկ Դեւիսը:
Նրա խոսքով, եթե տարվա վերջում արժեզրկում է լինում, դա վարկային ռիսկի վրա ազդում է, իսկ ՓՄՁ-ների վիճակը, որոնք չափից ավելի վարկեր են վերցրել դոլարով, վատանում է:
«Մի կողմից մենք փորձում ենք ավելացնելով տեղական արժույթով առկա ֆինանսավորման ծավալները կենսաթոշակային բարեփոխումների միջոցով, մյուս կողմից ընկերությունները պետք է իրենք հասկանան, որ եթե շարունակեն վարկեր վերցնել արտարժույթով, պարտքն իրենց վրա ծանր է նստելու»,-ընդգծեց նա:
Դիտարկմանը, թե վերջին մեկ տարում ըստ փորձագետների, Հայաստանում տասնյակ հազարավոր ՓՄՁ-ներ են փակվել, Դեւիսն արձագանքեց. «Ես համեմատելու բան չունեմ, ես չգիտեմ՝ դա աճ է, թե անկում: Ինձ համար ոչ մի զարմանալի բան չկա, որ ՓՄՁ-ները բացվում ու փակվում են»: