Չինական TBEA ընկերությունը շահագրգիռ է ներդրումային ծրագրի իրականացնել ՀՀ էներգետիկ ոլորտում, այդ թվում այլընտրանքային էներգետիկայի բնագավառում: Այս մասին, այսօր՝ հոկտեմբերի 29-ին, ՀՀ վարչապետ Հովիկ Աբրահամյանի հետ հանդիպման ժամանակ նշել է էլեկտրաէներգետիկայի արտադրության ոլորտում գործող չինական TBEA ընկերության գլխավոր տնօրեն Լի Բյան Ցույը:
Կառավարությունից NEWS.am-ին հայտնում են, որ զրուցակիցները քննարկել են չինական ընկերության կողմից ՀՀ-ում ներդրումային ծրագրի իրականացման քայլերն ու հեռանկարները: Լի Բյան Ցույը նշել է, որ իրենք ուսումնասիրել են Հայաստանի էներգետիկ ոլորտը եւ շահագրգիռ են ներդրումային ծրագրի իրականացման գործում, այդ թվում՝ այլընտրանքային էներգետիկայի բնագավառում:
Վարչապետ Հովիկ Աբրահամյանը ողջունել է ՀՀ-ում ներդրումային ծրագիր իրականացնելու TBEA-ի նախաձեռնությունը եւ նշել, որ ՀՀ կառավարությունը պատրաստ է օժանդակել դրա կյանքի կոչմանը, ինչն իր հերթին կնպաստի հայ-չինական տնտեսական կապերի ընդլայնմանն ու ամրապնդմանը:
Այնուհետեւ զրուցակիցներն անդրադարձել են հետագա փոխգործակցությանն առնչվող մի շարք հարցերի:
TBEA-ը համարվում է էլեկտրաէներգիայի արտադրությամբ եւ բաշխմամբ զբաղվող աշխարհի խոշորագույն ընկերություններից մեկը: Այն արդյունավետ գործունեություն է ծավալում նաեւ ԱՊՀ երկրներում: