ԱԺ անկախ պատգամավոր Վիկտոր Դալլաքյանը չի պատրաստվում կուսակցություն հիմնել: NEWS.am-ի թղթակցի հետ զրույցում պատգամավորն ասաց, որ տեղեկություններն այդ մասին չեն համապատասխանում իրականությանը: «Ես արդեն հոգնել եմ պատասխանել այն հարցին, որ նման մտադրություն չունեմ»,-հայտարարեց Դալլաքյանը՝ հավելելով, որ նման խոսակցությունները հորինվածք են:
Ի դեպ, տեւական ժամանակ է, ինչ մամուլում լուրեր են շրջանառվում այն մասին, որ Դալլաքյանը մտադիր է նոր կուսակցություն հիմնել, որը պետք է գալիք խորհրդարանական ընտրություններում լրացուցիչ ձայներ ապահովի ՀՀԿ-ի համար:
Ըստ տեղեկությունների՝ նորաստեղծ կուսակցությունում ընդգրկված են լինելու ՀՀՇ-ականները, ինչպես նաեւ այլ հայտնի եւ անհայտ քաղաքական մի շարք գործիչներ: Ըստ տեղեկությունների՝ Դալլաքյանը նույնիսկ հանդիպումներ է կազմակերպում փողատեր գործարարների հետ եւ համոզում, որ քաղաքական նոր ուժի ձեւավորման խնդիրը Հայաստանում օրհասական հարց է դարձել:
Ի դեպ, նշվում է նաեւ, որ նոր կուսակցության համագումարը տեղի է ունենալու ունենալու այս տարվա հոկտեմբերի 16-ին, Կարեն Դեմիրճյանի անվան մարզահամերգային համալիրում:
