Երեւանի քաղաքապետարանն այսօր՝ սեպտեմբերի 1-ին քննարկել է Հայ ազգային կոնգրեսի անդամ ՀՀՇ-ի կողմից ներկայացված իրազեկումը՝սեպտեմբերի 17-ին Ազատության հրապարակում հանրահավաք եւ երթ անցկացնելու մասին եւ մասամբ մերժել այն։ Այս մասին NEWS.am-ը տեղեկացավ քաղաքապետարանից:
Հանրահավաքի անցկացումն Ազատության հրապարակում արգելվել է, իսկ երթը՝ թույլատրվել։ Քաղաքապետարանը իր որոշումը հիմնավորել է, ասելով, որ Ազատության հրապարակում այդ օրը միջոցառում է նախատեսվում անցկացնել եւ այդ մասին իրազեկումը ներկայացվել է մինչ ՀՀՇ-ի իրազեկում ներկայացնելը: Ի դեպ, ՀՀՇ ներկայացուցիչները չեն մասնակցել քննարկմանը եւ պաշտոնապես դեռեւս չեն ծանուցվել քաղաքապետարանի որոշման մասին:
ՀՀՇ գործադիր քարտուղար Վահագն Հայոցյանը NEWS.am-ին հայտնեց, որ իրազեկումը քաղաքապետարան են ներկայացրել 19 օր առաջ: «Իրազեկումը քաղաքապետարան հանձնելու պահին հայտարարությունների փակցման տեղում սեպտեմբերի 17-ի համար որեւէ կազմակերպության կողմից որեւէ այլ միջոցառման մասին ծանուցում չի եղել: Առաջինը մենք ենք եղել: Այնպես որ քաղաքապետարանը ապօրինի որոշում է կայացրել»,-ասաց Հայոցյանը: Նա միաժամանակ հավելեց, թե առայժմ հայտնի չէ, թե որտեղ են անցկացնելու նախատեսված հանրահավաքը: «Դեռ պետք է քննարկենք»,-ասաց նա: