Մեծ Բրիտանիայի վարչապետ Դեւիդ Քեմերոնը պատրաստ է աջակցել ԵՄ-ից երկրի դուրս գալու որոշումը, եթե Բրյուսելը չհամաձայնի ԵՄ անդամության Լոնդոնի նոր պահանջներին։ Այս մասին գրում է Guardian թերթը, որի տրամադրության տակ է հայտնվել Մեծ Բրիտանիայի կառավարության նամակից մի հատված, որը նոյեմբերի 10-ին պետք է ուղարկվի Եվրոպական խորհրդի նախագահ Դոնալդ Տուսկին։
«Եթե մենք չկարողանանք հասնել նման համաձայնության, եւ եթե Մեծ Բրիտանիայի մտահոգությունները անտեսվեն, մենք ստիպված կլինենք նորից մտածել, թե արդյոք ԵՄ-ն ճիշտ ընտրություն է մեզ համար։ Ինչպես ասել եմ ավելի վաղ, ես ոչինչ չեմ բացառում»,-ասել է Քեմերոնը։
Նամակում Քեմերոնը ներկայացրել է ԵՄ հիմնական բարեփոխումների ցանկը, որը նրա կարծիքով, անհրաժեշտ են Լոնդոնին։ Մասնավորապես, Մեծ Բրիտանիան պնդելու է, որ միգրանտների սոցիալական ապահովության տրամադրման 4-ամյա արգելք սահմանվի, ինչպես նաեւ ընդլայնվեն ազգային խորհրդարանների լիազորությունները, որպեսզի նրանք կարողանան արգելափակել ԵՄ օրենքները, հաղորդում է ՏԱՍՍ-ը։
