Չենք կարող թույլ տալ, որ բռնությունը, ծայրահեղականությունը, անհանդուրժողականությունը գերիշխեն: Այս մասին, այսօր՝ նոյեմբերի 14-ին, Մուսա լեռան հերոսամարտի 100-ամյա հոբելյանի կապակցությամբ, Արմավիրի մարզի Մուսա լեռան հուշահամալիրում կայացած միջոցառման ժամանակ իր ելույթում նշել է ՀՀ նախագահ Սերժ Սարգսյանը՝ անդրադառնալով Փարիզում տեղի ունեցած ահաբեկչական գործողություններին:
Նա մասնավորապես, ասել է.
«Վեհափառ Տե՛ր,
Գերաշնո՛րհ սրբազան հայրեր,
Հարգելի՛ հյուրեր,
Սիրելի՛ հայրենակիցներ,
Այսօր մենք այստեղ ենք՝ նշելու Մուսա լեռան ինքնապաշտպանության 100-ամյա հոբելյանը: Այն 1915թ. Հայոց պատմության հերոսական դրվագներից մեկն է, որտեղ անգնահատելի ավանդ ունեն ֆրանսիացի մեր եղբայրները: 100 տարի է անցել, բայց մեր երախտագիտության զգացողությունը փոքր-ինչ անգամ չի նվազել:
Սիրելի՛ հայրենակիցներ,
Ցավոք, ճակատագրի հեգնանքով մենք այս գիշեր ականատեսը եղանք Ֆրանսիայի սրտում՝ Փարիզում, իր մասշտաբներով աննախադեպ ահաբեկչական գործողությունների իրականացմանը: Բոլորս խորապես ցնցված ենք:
Խստագույնս դատապարտում եմ այդ զարհուրելի ու զազրելի գործողությունները, որոնք բազմաթիվ մարդկային անմեղ կյանքեր խլեցին:
Վերջին տարիներին աշխարհի տարբեր երկրներում այսօրինակ անմարդկային բնույթի բռնությունների աճը լուրջ մտահոգությունների տեղիք է տալիս: Վստահ եմ, որ քաղաքակիրթ հանրության յուրաքանչյուր անդամ պարտավոր է միանալ բոլորիս պատուհասած այս չարիքի դեմ պայքարին: Մենք չենք կարող թույլ տալ, որ բռնությունը, ծայրահեղականությունը, անհանդուրժողականությունը գերիշխեն: Մենք պարտավոր ենք համատեղ ջանքերով բացահայտել եւ արմատախիլ անել այն գործոնները, որոնք ծայրահեղականության նման սարսափազդու դեպքերի պատճառ են հանդիսանում:
Այս դժվար պահին Հայաստանը եղբայր Ֆրանսիայի կողքին է եւ պատրաստ է ամենայն աջակցության:
Խորին ցավակցություն եմ հայտնում Ֆրանսիայի նախագահ Ֆրանսուա Օլանդին, Ֆրանսիայի բարեկամ ժողովրդին եւ զոհվածների հարազատներին՝ մաղթելով համբերություն, ուժ ու կորով, իսկ վիրավորներին՝ շուտափույթ ապաքինում:
Ֆրանսիացի ժողովրդի հետ են մեր աղոթքները, սրտերը եւ հոգիները»: