Ֆրանսիայի նախագահ Ֆրանսուա Օլանդը հատուկ ծառայություններից եւ անվտանգության ուժերից պահանջել է բոլոր ջանքերը ներդնել Ֆրանսիայում նոր ահաբեկչություններ թույլ չտալու համար, հատկապես՝ նախընտրական շրջանում: ՏԱՍՍ-ի փոխանցմամբ՝ այս մասին Ելիսեյան պալատից հայտնել են Պաշտպանության եւ ազգային անվտանգության խորհրդի նիստից հետո:
Դրանից զատ, Օլանդը ողջունել է Մոսուլում իրավիճակի զարգացումը, որտեղ կառավարական ուժերը միջազգային կոալիցիայի ուժերի աջակցությամբ գործողություն են անցկացնում «Իսլամական պետություն» ահաբեկչական խմբավորման դեմ: «Խորհուրդը ուսումնասիրել է ստեղծված պայմանները եւ այդ ահաբեկչական խմբավորման դեմ պայքարում ֆրանսիական զորքերի կողմից տեղական ուժերին աջակցության ցուցաբերելու հնարավորությունները»,- հայտարարել են Օլանդի աշխատակազմից:
Պաշպանության խորհրդի շրջանակում Ելիսեյան պալատում կանոնավորապես քննարկվում են ահաբեկչական եւ այլ տեսակի սպառնալիքները: Այսպես՝ մեկ շաբաթ առաջ հրավիրված նիստի ժամանակ որոշվել է, որ Տեղեկատվական համակարգերի անվտանգության ազգային գործակալությունը աջակցություն կցուցաբերի ընտրական հանձնաժողովներին եւ Սահմանադրական խորհրդին: Իսկ մարտի 21-ից ցույցերի եւ նախընտրական հանրահավաքների ժամանակ իրավակարգի պահպանմանը «Վիժիպիրատ» գործողության շրջանակում կներգրավվեն զինծառայողներ, որը նախաձեռնվել է 2015 թվականին Փարիզում ահաբեկչություններից հետո: