ԱԺ ՀՅԴ խմբակցությունը 2016 թվականի պետական բյուջեի նախագծի վերաբերյալ վերջնական դիրքորոշումը դեռ չի հայտնում։ Խմբակցության քարտուղար Աղվան Վարդանյանը NEWS.am-ի հետ զրույցում ասաց, որ կողմ չեն լինելու, բայց թե կողմ չլինելու որ տարբերակը կնախընտրեն, դա դեռ վերջնականապես որոշված չէ։

«Մեր ելույթներում հստակ գնահատելով այսօրվա բյուջեն, որն իսկապես, վերջին տարիների ամենաթույլ բյուջեն է, մենք մեր տեսակետները հայտնել ենք՝ շատ հավասարակշռված եւ հայտարարել, որ չենք կարող կողմ լինել։ Քվեարկության մի քանի ձեւեր կան, կառավարությունը բյուջեի վրա դեռ աշխատում է, երբ վերջնական կբերեն կներկայացնեն, մենք վերջնական կհստակեցնենք կողմ չլինելու տարբերակը»,-ասաց Աղվան Վարդանյանը։

Հարցին, թե կողմ չքվեարկելով՝ հերքո՞ւմ են այն մեկնաբանությունները, որ ՀՅԴ-ն մինչեւ խորհրդարանական ընտրությունները կոալիցիա է կազմելու իշխանության հետ, Վարդանյանը պատասխանեց․ «Մենք մշտապես ասել ենք, որ այս Սահմանադրությունը շանս է երկրում փոփոխություններ կատարելու: Մենք երկրում ունենք բազմաթիվ խնդիրներ ու եթե ունենանք համոզում, վստահություն, որ երկիրը գնալու է մեր պատկերացումների ուղղությամբ, ինչը հնարավորություն կտա փոփոխություն կատարել, մենք կարող ենք ցանկացած պահի էլ մտնել կոալիցիա։ Եթե այդ երաշխիքները, վստահությունը չունենանք, մենք ինքնանպատակ որեւէ կոալիցիա մտնելու ցանկություն չենք ունենա։ Սա բազմիցս հայտարարել ենք»։