Թուրքիայի կողմից Աղթամարի Սուրբ Խաչ եկեղեցում պատարագ մատուցելու թույլտվությունը շոու է՝ ուղղված թե ներքին, թե արտաքին լսարանների համար: Այս մասին սեպտեմբերի 4-ին տեղի ունեցած ասուլիսում հայտարարեց ԱԺ ՀՀԿ խմբակցության պատգամավոր Արտակ Զաքարյանը:
Նրա խոսքով, քանի որ Թուրքիայում առաջիկայում տեղի են ունենալու ընտրություններ, այդ երկրի իշխանությունները փորձում են ներքին լսարանի եւ նաեւ միջազգային հանրության աչքում երեւալ որպես ազատական ու հանդուրժող, այդ նպատակով էլ կազմակերպում են նմանատիպ միջոցառումներ: Զաքարյանի խոսքով՝ քարոզչական նպատակով կազմակերպված այդ շոուին Հայաստանի մասնակցությունը նպատակահարմար չէ:
«Այդ միջոցառումը առանձնապես լուրջ մասնակցության կարիք չունի: Անձնական նախաձեռնությունների հիման վրա՝ որպես տուրիստական այցելություն գուցե արժե մասնակցել այդ միջոցառմանը: Սակայն բարձր մակարդակի մասնակցությունը անիմաստ է»,- հայտարարեց Զաքարյանը:
Նշենք, որ սեպտեմբերի 19-ին կայանալիք պատարագին ինչպես ավելի վաղ հայտնել էր NEWS.am-ը, կմասնակցեն Մայր Աթոռ Սուրբ Էջմիածնի միաբաններ Մարկոս եպիսկոպոս Հովհաննիսյանը եւ Կոմիտաս վարդապետ Հովնանյանը: Մինչդեռ Մեծի Տանն Կիլիկիո կաթողիկոսությունը չի մասնակցելու Աղթամարի Ս. Խաչ եկեղեցու պաշտոնական բացման հանդիսությանը:
Հիշեցնենք, որ Թուրքական իշխանությունները հայտարարել են, թե մինչեւ սեպտեմբերի 19-ը տեխնիկական պատճառներով չեն հասցնի Աղթամարի Ս. Խաչի գմբեթին Խաչը տեղադրել եւ այն կմնա պատարագից հետո:
