10-ամիս առաջ բանակ զորակոչված եւ նոյեմբերի 6-ին հոգեկան խնդիրներով Երեւանի կայազորային հոսպիտալ տեղափոխված, Երեւանի 19-ամյա բնակիչ Արթուր Հակոբյանը դեպքից նոր մանրամասներ է պատմել հարազատներին: NEWS.am-ի հետ զրույցում զինվորի մորաքույրը` Ռիտա Հակոբյանը նշեց, որ Արթուրի հիշողությունը որոշ չափով վերականգնվել է եւ նա իրեն տեսակցության գնացած տատիկին` Հայկուշ Սարգսյանին, պատմել է, որ գումարտակի հրամանատար Ջիվան Մկրտչյանն իրեն ոչ միայն նոյեմբերի 6-ին է ծեծի ենթարկել, այլեւ` ծառայության մյուս օրերին:
«Տատիկին պատմել է, որ էդ Ջիվանն իր հետ առանց պատճառի թարսվել է, սկսել է նեղել երեխային, ասել է` ծառայությունը կթթվի վրեդ: Արթուրը պատմել է, որ աչքերի կապտուկներն անցկացնելու համար զուբնոյ պաստ է քսել աչքերին, որ չերեւան: Մի անգամ էլ նենց ա վախեցրել, որ վախից չաստի ծառերի տակ ա քնել երեխեն, ներս չի գնացել: Դեպքի օրն էլ սիգարետ առնելու է գնացել, Ջիվանը խանութի մոտ տեսել է ու սկսել է ծեծել, այնքան որ երեխուն հոսպիտալ են տեղափոխել»,-ասաց Արթուրի մորաքույրը:
Ռիտա Հակոբյանը նշեց, որ ինքը պայքարելու է, մինչեւ գործի հանգամանքները ամբողջությամբ պարզվեն եւ սպան պատժվի. «Պայքարելու եմ, որ Արթուրիս նման այլ զինվորների էլ նույն օրին չհասցնի, գործող տուժող ա ճանաչվել Արթուրս, բայց գործը կոծկելու համար սկսել են գեների մեջ հոգեկան հիվանդությամբ տառապողների փնտրել, բայց ես սա այսպես չեմ թողնի»:
Ավելի վաղ տեղեկացրել էինք, որ 10-ամիս առաջ բանակ զորակոչված եւ նոյեմբերի 6-ին հոգեկան խնդիրներով Երեւանի կայազորային հոսպիտալ տեղափոխված, Երեւանի 19-ամյա բնակիչ Արթուր Հակոբյանի հարազատները պնդում են, որ զինծառայողին բանակում ծեծել է գումարտակի հարբած հրամանատարը:
Հիշեցնենք, որ ՀՀ քննչական կոմիտեի զինվորական քննչական գլխավոր վարչության 9-րդ կայազորային քննչական բաժնում հարուցվել է քրեական գործ՝ զինվորական ծառայության պարտականությունները կատարելու կապակցությամբ ստորադասին ծեծելու դեպքի առթիվ:
ՀՀ քրեական օրենսգրքի 358.1 հոդվածի երկրորդ մասով նախատեսված հանցագործության կատարումը մատնանշող բավարար տվյալներ՝ ՀՀ քննչական կոմիտեի զինվորական քննչական գլխավոր վարչության 9-րդ կայազորային քննչական բաժնի ՀԿԳ քննիչի կողմից նոյեմբերի 13-ին որոշում է կայացվել քրեական գործ հարուցելու մասին։ Զինծառայող Արթուր Հակոբյանը ճանաչվել է տուժող:
