Կարաս ազգային սննդի ցանցն այսօր՝ դեկտեմբերի 2-ին, հայտարարել է «Սահմանն իմ հոգում» Բարեգործական Մարաթոնի մեկնարկի մասին:
Այս Ամանորին Կարաս ցանցը չեղյալ է հայտարարել բոլոր ակցիաները, զեղչերը եւ բոնուսները՝ մեկնարկելով Բարեգործական Մարաթոն, որի արդյունքում ցանցի վաճառքների 5%-ն ուղղվելու է Տավուշի 11 սահմանամերձ գյուղերի 992 դպրոցականների եւ 336 ուսուցիչների աջակցությանը: Հավաքված ամբողջ միջոցներով ցանցը կգնի առաջին անհրաժեշտության սննդամթերք եւ գրենական պիտույքներ:
«Մեր սահմանները պահող սահմանամերձ գյուղերի բնակիչները բազմաթիվ լուրջ խնդիրներ ունեն՝ ամեն օր լինելով վտանգի տակ: Միայն այն փաստը, որ նրանք դիմակայում են, չեն լքում իրենց հայրենիքն՝ արդեն հերոսություն է, որը մեզ բոլորիս ոգեշնչում է եւ հոգեւոր ուժ փոխանցում: «Սահմանն իմ հոգում» Բարեգործական Մարաթոնը Կարասի շնորհակալությունն է թշնամու նշանակետի տակ գտնվող գյուղերի բնակիչներին: Նրանցից յուրաքանչյուրը ուշադրության կարիք ունի: Մենք պետք է նեցուկ լինենք, կանգնենք մեր հայրենակիցների կողքին եւ աջակցենք մեր միասնությամբ»,- իր խոսքում նշեց Կարաս ցանցի հիմնադիր Աշոտ Հարությունյանը:
Նախագծի իրականացման համար Կարաս ցանցի հիմնադիրներ՝ Տիգրան Յուզբաշյանը եւ Աշոտ Հարությունյանը, այցելեցին Տավուշի սահմանամերձ գյուղերը եւ մասնավորապես դպրոցները` ծանոթանալով դպրոցականների, ուսուցիչների եւ նրանց կյանքի առօրյա խնդիրների հետ:
Տեղեկանալով Կարասի մտադրությունների մասին, Բարեգործական Մարաթոնին միացան նաեւ Տավուշի թեմի առաջնորդ Բագրատ Սրբազանը եւ երգիչ-երգահան Դավիթ Ամալյանը, իսկ ինֆորմացիոն աջակցությունը ցուցաբերեց ռադիո «Վանը»:
«Այսօր շատերը բարձրաձայնում են մեր երկրում առկա կյանքի դժվարությունների եւ օգնության անհրաժեշտության մասին: Մենք որոշեցինք ոչ միայն խոսել, այլ նաեւ գործել: «Սահմանն իմ հոգում» նախագծի նպատակն է ոչ միայն աջակցություն ցուցաբերել, այլ նաեւ ուշադրություն գրավել այս եւ նմանատիպ խնդիրների վրա: Կարասը երախտապարտ կլինի բոլոր նրանց, ովքեր պատրաստ կլինեն միանալ այս Բարեգործական Մարաթոնին՝ նյութական եւ բարոյական աջակցությամբ»,- նշեց Կարաս ցանցի հիմնադիր Տիգրան Յուզբաշյանը:
