Եվրոպական հանձնաժողովի հանձնակատար Յոհանես Հանը չի ասել, որ Հայաստանի հետ բանակցային գործընթացը պետք է ուղեկցվի այլ երկրների տարածքային ամբողջականությունը հարգելով։ Այդ մասին NEWS.am-ի հետ զրույցում ասել է ԱԳՆ մամուլի խոսնակ Տիգրան Բալայանը։

Դիտարկմանը, թե մամուլում տեղեկություններ էին հրապարակվել՝ իբրեւ թե ԵՄ արտաքին քաղաքականության հարցերով բարձր ներկայացուցիչ Ֆեդերիկա Մոգերինին կամ Եվրոպական հանձնաժողովի հանձնակատար Յոհանես Հանը ասել էին, որ Հայաստանի հետ բանակցային գործընթացը պետք է ուղեկցվի այլ երկրների տարածքային ամբողջականությունը հարգելով, Տիգրան Բալայանը պատասխանել է. «Ոչ Մոգերինին, ոչ էլ Հանը նման հայտարարություն չեն արել։ Այդ տեղեկատվությունը հիմնված էր լրատվամիջոցներից մեկի բրյուսելյան թղթակցի ՝Հանին վերագրված արտահայտության վրա, որն իրականում այդպես չէր ասվել։ Սակայն դա չէր խանգարել, որպեսզի այլ լրատվամիջոցներ էլ դա կրկնեին, եւ նույնիսկ առավել աղավաղված ձեւով ներկայացնեին»։