Բանակցելուց հետո ոստիկանները բացեցին Մոսկովյան պուրակը եւ թույլ տվեցին, որ մարդու իրավունքների պաշտպանությանը նվիրված երթի մասնակիցները մոտենան Կենտրոնական ընտրական հանձնաժողովի շենքին եւ ներկայացնեն իրենց պահանջը` անվավեր ճանաչել դեկտեմբերի 6–ի հանրաքվեի արդյունքները (ֆոտոռեպորտաժ)։
Երթի մասնակիցները շենքի առջեւ կանգնած վանկարկեցին «անվավեր», «հանցագործներ», «Մուկուչյան նկարիչ»։
Սահմանադրական փոփոխությունների դեմ պայքարող ուժերի ձեւավորած «Ոչ»–ի ճակատի շտաբի ղեկավար, ՀԱԿ փոխնախագահ Լեւոն Զուրաբյանը ԿԸՀ շենքի դիմաց հայտարարեց, որ իրենց բողոքն ուղղված չէ միայն Տիգրան Մուկուչյանին, այլեւ իշխանություններին:
Արամ Մանուկյանը շնորհակալություն հայտնեց բոլոր նրանց, ովքեր «ոչ» են քվեարկել հանրաքվեին։
«Սիրելի «ոչ» քվեարկած սպաներ ու ոստիկանների, շնորհակալություն բոլորիդ, որ դուք «ոչ» եք քվեարկել, դուք ձեր խղճի առաջ մաքուր եք: Դուք հետո մի օր ձեր երեխաների, ընկերների առաջ կպարծենաք, որ ձեր խիղճը մաքուր է: Շնորհակալություն բոլոր ուսադիր ունեցող մեր ընկերներին, որ գնացին ու «ոչ» քվեարկեցին:
Վաղը «Ոչ՛–ի ճակատը ԿԸՀ կներկայացնի հանրաքվեի արդյունքները անվավեր ճանաչելու պահանջը` հիմնավորումներով։
Կազմակերպիչները հայտարարեցին, որ ակցիան ավարտված է, բայց պայքարը շարունակվելու է։
«Նոր Հայաստանը», որի կազմում են «Ժառանգությունը» եւ «Հիմնադիր խորհրդարանը» հիշեցրեց, որ դեկտեմբերի 11-ին, ժամը 17:00-ին, իրենք հանրահավաք են հրավիրել Ազատության հրապարակում: Լեւոն Զուրաբյանը NEWS.am–ի հետ զրույցում ասաց, որ իրենք դեռ չեն որոշել` կմիանան «Նոր Հայաստանի» հանրահավաքին, թե ոչ։