ԼՂՀ քաղաքական ուժերը ու ղեկավարությունը հանգել են այն եզրակացության, որ կառավարման նախագահական մոդելը ավելի արդյունավետ կլինի ներկա իրավիճակում: Այս մասին օգոստոսի 31-ին մամուլի ասուլիսի ժամանակ ասել է ՀՀԿ խմբակցության պատգամավոր Շիրակ Թորոսյանը:
Անդրադառնալով առաջարկված սահմանադրական փոփոխություններին՝ պատգամավորը շեշտել է, որ ԼՂՀ-ն անկախ ու ինքնիշխան պետություն է «Հետեւաբար Լեռնային Ղարաբաղը իրավունք ունի որոշել իր քաղաքական ապագան, պետական կառավարման համակարգը»,- նշել է Շիրակ Թորոսյանը:
Այն հարցին, թե ինչու է Հայաստանը ընտրել կառավարման խորհրդարանական մոդելը, իսկ Ղարաբաղը՝ նախագահական, պատգամավորը նկատեց, որ Հայաստանում ու Ղարաբաղում նույն իրավիճակը չէ: «Հայաստանը միջազգայնորեն ճանաչված պետություն է ու կառավարման խորհրդարանական մոդելի ընտրությունը պայմանավորված է հենց հայկական իրականության մեջ ժողովրդավարական սկզբունքների ամրապնդման անհրաժեշտությամբ: Իհարկե կան տեսակետներ, որ կառավարման նախագահական մոդելի դեպքում նույնպես հնարավոր կլինի զարգացնել ժողովրդավարական սկզբունքները: Դա քաղաքական նախապատվության հարց է», հավելել է Շիրակ Թորոսյանը:
ԼՂՀ նոր Սահմանադրության հայեցակարգը ենթադրում է անցում կառավարման նախագահական ձեւին: