Սահմանադրական փոփոխությունները բանակի մարտունակության վրա միայն դրական են ազդելու : Այդ մասին երեկ՝ հունվարի 20-ին Դիլիջանում զորացրված զինծառայողների հետ հանդիպմանն ասել է Հայաստանի նախագահ Սերժ Սարգսյանը՝ հավելելով, որ արդեն այսօր դրական միտումներ է տեսնում Պաշտպանության նախարարությունում:
«Ուզում եմ գովել Պաշտպանության նախարարին այն առումով, որ համապատասխան տեղում իրոք համապատասխան մարդիկ են աշխատում: Եվ ընդհանրապես՝ Պաշտպանության նախարարությունում պետք է ծառայեն այն տղաները, ովքեր իրենց քաջաբար են դրսեւորել»,- ասել է նախագահը՝ հավելելով, որ եթե չլիներ այն համոզմունքը, որ սահմանադրական բարեփոխումները դրական ազդեցություն կունենան բանակի վրա, դրանք երբեք չէին նախաձեռնվի:
Սարգսյանն ընդգծել է, թե Գերագույն գլխավոր հրամանատարի պարտականությունն է մոբիլիզացնել երկրի ռեսուրսները՝ ռազմաքաղաքական խնդիր լուծելու համար: «Իսկ ինչպե՞ս կարող է մոբիլիզացնել, եթե այդ որոշումները կայացնում է կառավարությունը: Պատկերացրեք՝ եթե կառավարությունում այսօր որոշումներ կայացնելու իրավունքը լինի մեկ այլ քաղաքական ուժի: Չի՛ կայացնի այդպիսի որոշում: Ենթադրենք՝ ռազմաքաղաքական խնդիր լուծելու համար մեզ անհրաժեշտ է 100 միլիոն դոլար՝ 50 մլրդ դրամ, իսկ այդ քաղաքական ուժը համարում է, որ այդ 50 միլիարդը պետք է ծախսել, ենթադրենք՝ աղքատությունը Հայաստանում քչացնելու վրա: Այսինքն, այսօր պատասխանատվությունը Գերագույն գլխավոր հրամանատարի վրա է, իրավունքը՝ մեկ այլ տեղ: Մինչեւ հիմա մենք այդ խնդիրը կարողացել ենք լուծել, որովհետեւ նույն քաղաքական ուժն ենք եւ՛ նախագահականում, եւ՛ կառավարությունում: Իսկ եթե այդ բալանսը խախտվի, շատ պրոբլեմներ կարող են լինել: Արել ենք հետեւյալը. պատասխանատու է նա, ով ունի իրավունքներ: Համապատասխանեցրել ենք, եւ սրանով մենք բարձրացրել են նաեւ Պաշտպանության նախարարի դերակատարությունը»,-մանրամասնել է նախագահը եւ ավելացրել, որ Պաշտպանության նախարարը կառավարության հավասարազոր անդամ է:
Նոր Սահմանադրությամբ Պաշտպանության նախարարը խաղաղ շրջանում գործողությունների մեծ ազատություն է ունենալու, իսկ զորքերը ենթարկվելու են կառավարությանը: Ռազմական ժամանակահատվածում վարչապետը դառնալու է գլխավոր հրամանատար, սակայն բանակի առումով այստեղ, ըստ հանրապետության նախագահի, որեւէ վտանգ չկա:
