ՀՀ գլխավոր դատախազ Գեւորգ Կոստանյանն այսօր` դեկտեմբերի 11-ին, հանդիպել է ՀՀ-ում Ամերիկայի դեսպան Ռիչարդ Միլսի հետ եւ մանրամասն քննարկել դեկտեմբերի 6-ին կայացած սահմանադրական փոփոխությունների հանրաքվեի արդյունքների հանդեպ հասարակության վստահությունը մեծացնելու հարցը: Լրագրողների հետ զրույցում Գեւորգ Կոստանյանն ասաց, որ դեսպանի հետ ինքը խոսել է այն մասին, որ ընտրախախտումների վերաբերյալ հարուցված քրեական գործերով քննությունը առավելապես հրապարակային պետք է լինի, որպեսզի հանրության շրջանում կասկածներ չլինեն։
«Ցանկացած քրեական գործ հարուցելու կամ մերժելու մասին որոշումից հետո կարող են լինել հրապարակային քննարկումներ, այդ թվում` հաղորդումը տվող անձի եւ նրա փաստաբանի մասնակցությամբ»,– ասաց Կոստանյանը։
Նշենք, որ ԱՄՆ եւ Եմ դեսպանները հայտարարել էին, որ հանրության վստահությունը քվեարկության արդյունքների վերաբերյալ բարձրացնելու համար անհրաժեշտ է հնարավորինս հրապարակային եւ անաչառ քննություն անցկացնել:
Այնուամենայնիվ, Գեւորգ Կոստանյանը նշեց, որ այս պահին ինքը հանրաքվեի արդյունքների լեգիտիմությանը կասկածելու հիմքեր չունի, ինչ վերաբեորում է ընդդիմադիր «Հայ ազգային կոնգրես» կուսակցության հայտարարությանը, որ հանրաքվեի ընթացքում կես միլիոն ձայն է կեղծվել, Կոստանյանը նշեց, որ այդ հայտարարությունը հիմնավորող որեւէ փաստ Գլխավոր դատախազություն չի ներկայացվել:
«Եթե ունեն նման փաստեր, հուսով եմ, որ դրանք կուղարկվեն դատախազություն, եթե նույնիսկ չուղարկեն, այլ գոնե հրապարակեն, այդ դեպքում միայն ես կկարողանամ կարծիք հայտնել»,-ասաց Կոստանյանը:
