Հայ ազգային կոնգրեսը փիլիսոփաների դաշինք է, որը փորձում է ինժեներական տարրեր մտցնել իր գործունեության մեջ; Այս մասին սեպտեմբերի 9-ին լրագրողների հետ հանդիպման ժամանակ հայտարարեց սահմանադրագետ Հրայր Թովմասյանը՝ պատասխանելով NEWS.am-ի հարցին, թե ի՞նչ գնահատական կտաք ՀԱԿ-ի անցած երկու տարվա գործունեությանը: Որպես «ինժեներական տարրեր»՝ Թովմասյանը նշեց ՀԱԿ-ի կողմից ներկայացվող ծրագրերը, նախագծերը, հանձնաժողովներում ծավալվող քննարկումները, ինչպես նաեւ այս կամ այն որոշման կամ իրավական ակտի վերաբերյալ դատական հայցերը: «Այսինքն, «կամ` ամեն ինչ, կամ` ոչինչ»-ի տրամաբանությունը փոխվել է: Թեպետ Երեւանի ավագանու ընտրությունների արդյունքներից հետո այսօր գերիշխող են մնում փիլիսոփայական տրամադրությունները. «не царское дело» գնալ եւ ավագանու աշխատանքներով զբաղվել»,-նկատեց Թովմասյանը:
Նա միաժամանակ հավելեց, որ ՀԱԿ-ի որդեգրած ռադիկալ դիրքորոշումը՝ ամեն կերպ հասնել իշխանափոխության, փակուղային է: «Երբ ասում են՝ ես գալու եմ իշխանության, քեզ ուղարկելու եմ Հաագայի դատարան, դա փիլիսոփայական ճանապարհ է եւ ռեալ ոչինչ չի պարունակում»: Թովմասյանի գնահատմամբ՝ Հայաստանի քաղաքական համակարգը մի շարք բացթողումներ ունի, եւ այսօր առկա է մի իրավիճակ, երբ քաղաքական ընդիմության ամենազանգվածային մասը խորհրդարանից դուրս է: «Մենք ինստիտուցիոնալ ոչ մի եղանակ չունենք այդ բանավեճը, որը կարող է լինել նաեւ կոնստրուկտիվ, տանել դեպի պառլամենտ: Եւ այդ բանավեճը դուրս է գալիս փողոց: Այ այս հարցի լուծումները մենք պետք է գտնենք»,-նշեց սահմանադրագետը:
