Դիտորդների զեկույցներից պարզ է դառնում, որ Հայաստանում սահմանադրական հանրաքվեի ընթացքում խախտումներ են գրանցվել: Այս մասին NEWS.am –ի թղթակցի հետ զրույցում ասել է Հայաստանում Շվեդիայի Թագավորության դեսպանության գործերի ժամանակավոր հավատարմատար Մորթեն Էնբերգը:
Դիվանագետի խոսքով՝ իրականում ինքը չէ, որ պետք է գնահատի սահմանդրական հանրաքվեի ընթացքը: «Կան միջազգային կազմակերպություններ, որոնք կարող են դա անել»,- նշել է Էնբերգը:
Ինչ վերաբերում է կառավարման խորհրդարանական համակարգի անցնելուն, դիվանագետը նշել է, որ ինքը չի կարող նշել, թե Հայաստանի համար որ համակարգն է ավելի լավ լինելու: «Դա բացառապես Հայաստանի որոշումն է: Բայց ես կարող եմ նայել Շվեդիայի տեսակետից, մեզ մոտ նույնպես խորհրդարանական համակարգ է: Մեզ համար դա նշանակում է, որ քաղաքական կուսակցություններն իրենց գործունեությամբ ավելի պրոֆեսիոնալ են դառնում: Օրինակ, եթե դու ընդդիմադիր ճամբարում ես, ապա պետք է սեփական սոցիալական քաղաքականությունը վարես, այպես կոչված՝ ստվերային կաբինետը: Միգուցե այդ ամենը Հայաստանում ավելի լավ զարգանա կառավարման խորհրդարանական համակարգի դեպքում»,- ասել է Մարտեն Էնբերգը:
Հիշեցնենք, որ դեկտեմբերի 6-ին Հայաստանում կայացել է սահմանադրական հանրաքվե: Պաշտոնական տեղեկություններով սահմանադրական փոփոխություններին կողմ է արտահայտվել քվեարկողների 63 տոկոսը: