Քյոլնի կենտրոնում հազարավոր կանայք բողոքի ակցիայի են հավաքվել Նոր տարուն իրականացված հարձակումների դեմ, տեղեկացնում է Euronews-ը:
«Մեզ ուղղակի ձեռք էին գցում, իմ ոտքերի արանքին էին ձեռք տալիս: Ընկերուհիներիս էլ: Ընկերս ինձ հանեց այդտեղից: Բավականին մեծ ընկերախումբ էր` քսան-երեսուն մարդ կլիներ»,— տուժածներից մեկի խոսքերն է մեջբերում «Կոմերսանտը»:
Նոր տարվա գիշերը Քյոլնում կարգ ու կանոնը պահպանում էր մոտ 200 ոստիկան, բայց նրանք չկարողացան բոլորին օգնել մարդկանց մեծ կուտակման պատճառով:
«Ես օգնության հասա կանանցից մեկին: Նա բղավում էր ու լաց լինում: Նրա վարտիքը հանեցին», - հիշում է իրավապահներից մեկը, տեղեկացնում է Ruposters-ը:
Աճում է այն կանանց թիվը, որոնք ոստիկանությանը դիմում են ներկայացրել Քյոլնում ներգաղթյալների կողմից հարձակումների վերաբերյալ: Նրանց թիվն արդեն հարյուրից անցել է: Դիմումների երեք չորրորդը կապված է սեռական ոտնձգությունների մասին հայտարարությունների հետ, տեղեկացրել է քաղաքի ոստիկանության ներկայացուցիչը:
Նոր տարվա գիշերը արաբական եւ հյուսիսաֆրիկյան արտաքինով հազարավոր մարդիկ Քյոլնի կենտրոնում զանգվածային անկարգություններ կազմակերպեցին: Նրանք խմբերի բաժանվեցին ու սկսեցին հարձակվել քաղաքացիների վրա, որոնեք եկել էին Նոր տարին նշելու, տեղեկացնում է НТВ-ն:
Շրջապատում էին երիտասարդ աղջիկներին, ավելի հաճախ` խմածներին, կպչում էին նրանց, պոկում էին նրանց հագուստը, թալանում էին: Հայտնի է բռնաբարության առնվազն մեկ դեպք, տեղեկացնում է «Ռոսիա 24»-ը:
Տուժած կանանցից առաջին հայտարարությունները սկսել են ստացվել հունվարի 1-ի առավոտյան, սակայն Քյոլնի ոստիկանությունը այդ մասին տեղեկացրել է միայն հունվարի 5-ին: Հետո հայտնի է դարձել Համբուրգում եւ Շտուտգարտում համանման բողոքների մասին, տեղեկացնում է Snob-ը:
ԳԴՀ-ի կանցլեր Անգելա Մերկելն արդեն արձագանքել է տեղի ունեցածին` պահանջելով անմիջապես լիարժեք հետաքննություն իրականացնել եւ պատժել բոլոր մեղավորներին:
