Անցյալ տարվա դեկտեմբերի պաշտոնական տվյալներով, մայրաքաղաք Երեւանում հացը տարեկան կտրվածքով թանկացել է 1 կգ-ը 15 դրամով կամ 3.0%-ով: Մարզային 10 քաղաքներից, որտեղ գների մոնիթորինգ է անցկացվում, հացի գինը միջինը թանկացել է Արտաշատում (7.4%-ով), Իջեւանում (6.7%-ով), Կապանում (4.9%-ով) եւ Վաղարշապատում (1.9%-ով):
Հանրապետության մյուս 6 քաղաքներում, որքան էլ տարօրինակ է, հացի գնի անկում է արձանագրվել: Միանգամայն հնարավոր է, որ փոխվել է դրա տեսականին, չնայած չի բացառվում նաեւ պարզ պատահականությունը:
Որոշակի «էժանացում» հնարավոր է հացի փաստացի քաշի նվազում: Հացի կշիռը նվազում է, գինը՝ նույնպես, բայց ավելի քիչ չափով: Արդյունքում հացի մեկ կիլոգրամն իսկապես թանկանում է, իսկ գնապիտակում՝ «էժանանում»: Այս դեպքում սպառողներն ավելի շատ են «էժանացած» հաց գնում. չէ՞ որ օրգանիզմը չի խաբվում:
Հացի՝ համեմատաբար էժան գինը բազմաթիվ ընտանիքների ընտրությունը միանշանակ է դարձնում: Պաշտոնական տվյալներով, հանրապետության ընտանիքների 15%-ի սննդակարգի ավելի քան 70%-ը ներառում է հացամթերք եւ կարտոֆիլ: Այդ առումով ամենավատ ցուցանիշը Շիրակի մարզում է՝ 22.7%:
Միաժամանակ, երկրում հացի արտադրությունը կրճատվում է (անցյալ տարվա հունվար-նոյեմբերին՝ տարեկան կտրածքով 2.0%): Հավանաբար, հացի գործարաններն արդեն բացահայտ բարձրացնում են գները: Ներկայացվող գրաֆիկում պատկերված է 2014-2015 թվականների դեկտեմբերի հացի պաշտոնական գների դինամիկան՝ ըստ հանրապետության քաղաքների: