Խայտառակություն է, որ լինելով Թուրքիայի եւ Ադրբեջանի կողմից բլոկադայի մեջ՝ Հայաստանն այնքան թույլ է գտնվել, որ չի կարողացել ներկայացնել իրականությունը: Այս մասին NEWS.am-ի հետ զրույցում նշել է ՀԱԿ խմբակցության քարտուղար Արամ Մանուկյանն՝ անդրադառնալով ԵԽԽՎ-ում  ընդունված Սարսանգի ջրամբարի վերաբերյալ հակահայկական զեկույցին։

«Լինես բլոկադայի մեջ Ադրբեջանի ու Թուրքիայի կողմից ու Ադրբեջանը կարողանա միջազգային հանրությանը ներկայացնել, որ դու ես բլոկադայի ենթարկել ու հումանիտար աղետի պատճառ կարող ես դառնալ, պարզապես խայտառակություն է»,- ասաց նա:

Ինչ վերաբերում է իշխանության այն արդարացումներին, թե ավելի կարեւոր էր բրիտանացի պատգամավոր Ռոբերտ Ուոլթերի՝ «Բռնության աճը Լեռնային Ղարաբաղում եւ Ադրբեջանի այլ գրավյալ տարածքներում» զեկույցը, որը հաջողվեց տապալել, ՀԱԿ խմբակցության քարտուղարը նշեց. «Մեր երկրի նկատմամբ սա քամահրանք է։ Սփյուռքն այլեւս մեզ չի օգնում։ Խավիարից են խոսում, 1994 թվականին նավթ ու խավիար չկա՞ր, ոնց եղավ, որ հիմա ամեն ինչ շրջվել է Հայաստանի դեմ: Պարզ չէ՞, որ իշխանությունների պատճառով է, թող նորմալ աշխատեին»։

Արամ Մանուկյանը տարակուսանքով արձագանքեց այն պնդումներին, թե մեկ զեկույցի մասով դիվանագիտական հաջողություն են արձանագրել․ «Իսկ ով ասաց, որ հաջողվել է, երկու փամփուշտով կրակել են, մեկով մեռել ես, դա հաջողությո՞ւն է, ամոթ է»։