Մարդու իրավունքների եվրոպական դատարանում մեկնարկել է «Չիրագովն ընդդեմ Հայաստանի» գործի քննությունը:
ՄԻԵԴ-ում Հայաստանի կառավարության ներկայացուցիչ Գեւորգ Կոստանյանը լսումների ընթացքում հայտարարել է, թե «Լեռնային Ղարաբաղի Հանրապետությունը եւ նրա հարակից տարածքները չեն գտնվում Հայաստանի Հանրապետության իրավասության եւ վերահսկողության ներքո»:
Գեւորգ Կոստանյանը, վկայակոչելով ԼՂՀ-ի` օրենքի պահանջներին համաձայն ու ժողովրդի կամարտահայտության հիման վրա անկախության հռչակման փաստը, դատարանին հայտնել է, թե ԼՂՀ-ում եւ նրա հարակից տարածքներում արդյունավետ վերահսկողություն իրականացնում են միայն ԼՂՀ իշխանությունները, իսկ Հայաստանն այնտեղ որեւէ իշխանություն չի իրականացնում:
Ըստ այդմ, Հայաստանի կառավարության ներկայացուցիչը հայտարարել է, որ ադրբեջանցի դիմումատուների գանգատը չի տեղավորվում Մարդու իրավունքների եվրոպական կոնվենցիայի պահանջների տիրույթում եւ ՄԻԵԴ կողմից դիտարկման ենթակա չէ:
Նշենք, որ այսօր ՄԻԵԴ-ում սկսվել է երկու գործի քննություն: «Չիրագովներն ընդդեմ Հայաստանի Հանրապետության» գործով հայցվոր ադրբեջանցի ընտանիքը պնդում է, որ «հայկական օկուպացիայի» հետեւանքով Լաչինում կորցրել է իր տունը, ունեցվածքը եւ զրկվել այն տեսանելի ապագայում օգտագործելու, ժառանգելու կամ զարգացնելու հնարավորությունից, քանի որ Հայաստանի կառավարությունը շարունակում է մերժել նրանց դիմումները` Լաչին վերադառնալու վերաբերյալ։
Մյուսը ներկայացրել է Շահումյանի շրջանի Գյուլիստանի բնակիչ Մինաս Սարգսյանի ընտանիքը, որը 1992թ. հունիսին ստիպված է եղել լքել իր հայրենի գյուղը եւ փասխատական դառնալ: Սարգսյանները փոխհատուցում են պահանջում փախուստի ժամանակ իրենց գույքի կորստի համար:
Նրանք նշել են, որ Ադրբեջանի Հանրապետությունը պատասխանատվություն է կրում նաեւ գյուղի մշակույթի հուշարձանների, իրենց նախնիների գերեզմանների ավիրման համար: