Մարդու իրավունքների եվրոպական դատարանում ընթացող «Չիրագովն ընդդեմ Հայաստանի» գործի լսումների ընթացքում իսպանացի դատավոր Լուիս Լոպես Գուերան դիմել է ադրբեջանցիներին եւ հետաքրքրվել, թե նրանք իրենց տները վերադառնալու խնդրանքով «դիմե՞լ են, արդյոք, Լեռնային Ղարաբաղի Հանրապետության իշխանություններին»:
Ի պատասխան Չիրագովի եւ մյուսների ներկայացուցիչները հայտնել են, որ դիմումատուներն Ադրբեջանին չեն դիմել, քանի որ նշված տարածքները չի վերահսկում, Հայաստանին էլ չեն դիմել, քանի որ նա նույնպես հայտարարում է տարածքները չվերահսկելու մասին: «Իսկ Լեռնային Ղարաբաղի՞ն»,- հարցը կրկնեց դատավորը:
Նշենք, որ ադրբեջանցիները մի քանի անգամ դիտողության են արժանացել դատավորների կողմից: Մեծ պալատի լսումները նախագահող ֆրանսիացի Ժան պոլ Կոստան զգուշացրել է ադրբեջանական պատվիրակությանը` հորդորելով, որ դատավորների հարցերին պատասխանեն ըստ էության եւ չկրկնեն այն, ինչ արդեն հայտնել են դատարանին:
Հիշեցնենք, որ այսօր ՄԻԵԴ-ում սկսվել է երկու գործի քննությունը: «Չիրագովներն ընդդեմ Հայաստանի Հանրապետության» գործով հայցվոր ադրբեջանցի ընտանիքը պնդում է, որ «հայկական օկուպացիայի» հետեւանքով Լաչինում կորցրել է իր տունը, ունեցվածքը եւ զրկվել այն տեսանելի ապագայում օգտագործելու, ժառանգելու կամ զարգացնելու հնարավորությունից, քանի որ Հայաստանի կառավարությունը շարունակում է մերժել նրանց դիմումները` Լաչին վերադառնալու վերաբերյալ։
Մյուսը ներկայացրել է Շահումյանի շրջանի Գյուլիստան բնակիչ Մինաս Սարգսյանի ընտանիքը, որը 1992թ. հունիսին ստիպված է եղել լքել իր հայրենի գյուղը եւ փասխատական դառնալ: Սարգսյանները փոխհատուցում են պահանջում փախուստի ժամանակ իրենց գույքի կորստի համար: Նրանք նշել են, որ Ադրբեջանի Հանրապետությունը պատասխանատվություն է կրում նաեւ գյուղի մշակույթի հուշարձանների, իրենց նախնիների գերեզմանների ավիրման համար: