Հայաստանում Բրիտանիայի դեսպանատունը երջանիկ է հերթական անգամ աջակցել Հայաստանում բրիտանական ֆիլմերի փառատոնին: Այս մասին փետրվարի 12-ին լրագրողներին հայտնել է Հայաստանում Միացյալ թագավորության դեսպան Ջուդիտ Ֆարնուորթը:
Փառատոնը , որը թվով արդեն 14-րդն է , սկսվելու է փետրվարի 20-ին ու կանցնի թե Երեւանում , թե Հայաստանի մարզերում: Երեւանում ցուցադրությունները անցնելու են փետրվարի 20-26-ը «Մոսկվա» կինոթատրոնում , իսկ հետո ցուցադրություններ կսկսվեն նաեւ մարզերում: Այս տարի բրիտանական կինոն կհասնի մինչեւ Ապարան , Դիլիջան ու Ալավերդի քաղաքներ:
«Բրիտանական ֆիլմերի փառատոնը բրիտանական կինոարվեստի լավագույն նմուշները ներկայացնելու հրաշալի հնարավորություն է: Մշակույթը մարդու իրավունքների ու ազատությունների մասին տեսակետներ փոխանակելու հոյաակապ միջոց է: Ֆիլմերը , որոնք դուք կտեսնեք , իրոք շատ լավն են, ու մենք հույս ունենք , որ դրանք կնվաճեն հայ հանդիսատեսի համակրանքը», - ասել է նա:
Փառատոնի հատուկ հյուրն է լինելու Սայմոն Ուիլքինսոնը , որն աշխատում է տրանսմեդիա ոճում: Կրեատիվ տեխնոլոգիաների «Թումո» երեւանյան կենտրոնում նա կցուցադրի իր ֆիլմը:
Փառատոնը կազմակերպել է British Council –ը՝ Միացյալ թագավորության դեսպանատան ու ընկերության աջակցությամբ: