ՀՀԿ-ՀՅԴ համագործակցության դեպքում կառավարության նոր ծրագիր չի ներկայացվի, կշարունակեն իրականացնել եղած ծրագիրը: Այս մասին, NEWS.am-ի թղթակցի հետ զրույցում նշել է քաղաքական տեխնոլոգ Կարեն Քոչարյանը:
Դիտարկմանը, թե այսօր կա հաստատված բյուջե, կառավարության ծրագիր, որն իրականացնվում, արդյոք այն պետք է փոփոխության ենթարկվի ՀՀԿ-ՀՅԴ համագործակցության դեպքում, որպեսզի այնտեղ ներառվեն նաեւ ՀՅԴ-ի ծրագրերից որոշ հատվածներ, քաղտեխնոլոգը պատասխանեց. «Այս վերջին մի տարին բնականաբար, դժվար նոր ծրագիր ներկայացվի: Եթե նոր վարչապետ լինի, բնականաբար, նոր ծրագիր կլինի: Բայց ես կարծում եմ, որ նոր վարչապետ չի լինի եւ ինչքան էլ կառավարության ու նախարարների փոփոխություններ լինեն, կառավարության ծրագրի փոփոխություն չի լինի: Այս մեկ տարվա ընթացքում կիրականացնեն այն ծրագիրը, որը ներկայացված է»:
Հարցին, թե այսինքն, խոշոր հաշվով, Դաշնակցությունը կիրականացնի Հանրապետականի ծրագի՞րը, Քոչարյանը պատասխանել է. «Ուրիշ բան չկա, Դաշնակցությունն ինքը հայտարարել է, որ մտնում է համագործակցության մեջ կյանքի կոչելու սահմանադրական փոփոխությունների ծրագրերը: Այսինքն բնականաբար կասեն իրենք պատրաստվում են 2017 թվականից իրականացնել սահմանադրական փոփոխությունների ծրագիրը»:
