Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանն այսօր՝ փետրվարի 15-ին, քննում է «Նոր Հայաստան» հանրային փրկության ճակատի անդամ Գեւորգ Սաֆարյանին գրավով ազատ արձակելու վերաբերյալ՝ փաստաբանի միջնորդությունը:
NEWS.am-ի թղթակիցը հաղորդում է, որ հանրային փրկության ճակատի մի քանի տասնյակ անդամներ հավաքվել են դատարանի առջեւ՝ սատարելու Ոստիկանության 4-րդ հատուկ գումարտակի հրամանատար, ոստիկանության կապիտան Գեղամ Խաչատրյանի նկատմամբ բռնություն կիրառելու մեջ մեղադրվող Գեւորգ Սաֆարյանին:
Հանրային փրկության ճակատի խորհրդի անդամ Վարուժան Ավետիսյանը նշեց, որ Գեւորգ Սաֆարյանին ազատ արձակելու հիմքեր են տեսնում, որը դատարանը պետք է հաշվի առնի:
«Գեւորգին ազատ արձակելու նպաստավոր պայմաններ կան: Նկատի ունեմ այն, որ քաղաքացիների ակտիվ մասնակցություն կա, բոլորն էլ հասկանում են, որ Գեւորգին անհիմն են կալանավորել եւ բոլորն էլ շահագրգռված են, որ նրան ազատ արձակեն»,- ասաց Վարուժան Ավետիսյանը՝ նշելով, որ եթե այսօր էլ բացասական եղավ պատասխանը, իրենք շարունակելու են պայքարը:
Ակցիայի մասնակիցներն այս պահին «Ազատություն քաղբանտարկյալներին», «Ազատեք երկիրը ներքին թշնամուց», «Կազմակերպված ժողովուրդն ամենազոր է» գրությամբ պաստառներով կանգնած են դատարանի շենքի առջեւ, որը հսկում են մեծ թվով ոստիկաններ: Դատրանի առջեւ է նաեւ «Հիմնադիր խորհրդարանի» անդամ Ժիրայր Սեֆիլյանը։
Հիշեցնենք, որ Երեւանի Ազատության հրապարակում Ամանորի գիշերը ընդդիմադիր «Նոր Հայաստանի» անդամների եւ ոստիկանների միջեւ բախումներ էին տեղի ունեցել: Պատճառը տոնածառի հագուստով մայրաքաղաքի փողոցներում շրջող ակտիվիստն էր: Երեք անձ բերման էր ենթարկել, այդ թվում՝ Գեւորգ Սաֆարյանը: Գեւորգ Սաֆարյանին մեղադրանք է առաջադրվել ՔՕ 316-րդ հոդվածի 1-ին մասով՝ իշխանության ներկայացուցչի նկատմամբ բռնություն գործադրելը: Ըստ իրավապահ մարմինների` Գեւորգ Սաֆարյանը բռնություն է գործադրել Ոստիկանության 4-րդ հատուկ գումարտակի հրամանատար, ոստիկանության կապիտան Գեղամ Խաչատրյանի նկատմամբ:
Դատարանի որոշմամբ Գեւորգ Սաֆարյանի նկատմամբ որպես խափանման միջոց է ընտրվել երկամսյա կալանքը:
