ՀՀ նախագահ Սերժ Սարգսյանի վերջին ելույթը դեկլարացիա է, որում նախանշված են ավելի լավ կառավարման համակարգ ունենալու մասին մտքեր եւ դրանք իրագործելու ծրագրեր: Այս մասին այսօր՝ փետրվարի 14-ին լրագրողների հետ հանդիպմանը ասաց ՀՀԿ պատգամավոր Մանվել Բադեյանը:
«Նախագահի ուղերձը ինձ վրա մեծ տպավորություն թողեց, որովհետեւ մի կողմից արտահայտված բոլոր մտքերը որեւէ լուրջ քննադատության չեն արժանացել, մյուս կողմից դա ապագային նվիրված մտորումներ են: Նախագահն ասում է՝ այո, ունենալու ենք նոր Սահմանադրություն, նոր քաղաքական համակարգ, բայց իշխող կառավարությունը չպետք է մոռանա, որ մենք նաեւ ներկայիս կառավարման համակարգում լուծելու խնդիրներ ունենք, որոնց համար ծրագրեր է առաջարկում»-ասաց պատգամավորը:
Ասուլիսի մյուս բանախոս, Մարդու իրավունքների նախկին պաշտպան Լարիսա Ալավերդյանն էլ նախագահի ելույթում մի շարք լեզվաբանական խութեր էր հայտնաբերել, եւ հորդորեց «ճառը գրողներին» ավելի ուշադիր լինեն հետագայում:
«Ես կուզեի, որ մեր երկրի նախագահի ճառն ամենալավը լինի, բայց ճառում հռետորական ձեւակերպումները շատ էին, իսկ ծրագրային մտքերը պետքէ լինեին ավելի հասցեական եւ հստակ»,-ասաց Լարիսա Ալավերդյանը:
Մանվել Բադեյանին զավեշտալի թվաց, որ ռուսական կրթություն ունեցեղ Լարիսա Ալավերդյանը քննադատում է ելույթի լեզվաբանական թերացումները, իսկ բովանդակային առումով որեւէ լուրջ քննադատություն չարեց:
ՀՀԿ պատգամավորը եզրափակեց՝ նախագահի ելույթը ուղղված էր ոչ թե կուսակցությանը, այլ հասարակությանը:
