Աղթամար կղզու Սուրբ Խաչ եկեղեցում պատարագից առաջ Վանում ներկայացվեց Ս.Խաչ եկեղեցու մասին պատմող երկլեզու աշխատությունը:

Ըստ «Գազետեվան»-ի, սեպտեմբերի 17-ին Վանում տեղի ունեցավ թուրքական Birzamanlar Yayincilik հրատարակչության եւ Լոնդոնի «Կոմիտաս» ինստիտուտի հետ համատեղ հրատարակած Վանի Աղթամարի Ս.Խաչ եկեղեցու մասին պատմող երկլեզու աշխատությունը։

«Աղթամար. Միջնադարյան հայկական ճարտարապետության զարդը»  վերնագիրը կրող գիրքը ներկայացրեցին Արա Սարաֆյանը եւ Օսման Քոքերը։

Արա Սարաֆյանն  ասաց, որ գիրքը հրատարակում են արարողությունից առաջ, որպեսզի մասնակիցները քաջատեղյակ լինեն եկեղեցու պատմությանը: Իսկ  Օսման Քոքերը թուրք պատմագրությունում ոչ թուրք տարրերի մասին հազվադեպ հիշատակման մասին նշելով, ասաց. «Բոլոր լավ բաները թուրքերն են արել, իսկ մնացածին տեղ է հատկացվում, միայն բացասական  միջադեպերի ժամանակ: «Ազատագրման պատերազմի ժամանակ մեզ թիկունքից դանակահարել են». այսպիսի պատմություն գրելու ոճ ունենք: Սրանից բացի, մեր պատմաբաններից ոչ մեկը հայկական աղբյուրներին լիարժեք ծանոթ չէ` հայերեն չիմանալու պատճառով»:

Միջոցառումը ավարտվեց հարց ու պատասխանով:

Գրքի կազմողներն են լոնդոնաբնակ Արա Սարաֆյանը եւ Օսման Քոքերը։ Գրքում ներկայացված է Ստեփան Մնացականյանի ուսումնասիրությունը։

Գիրքը կազմված է 168 էջից, որի մեջ ընդգրկված են 68 գունավոր լուսանկար եւ 19 քարտեզ։