Այսօր` սեպտեմբերի 18-ին երկու հոգեւորականների ուղեկցությամբ Վան է ժամանել Պոլսո հայոց պատրիարքական փոխանորդ արքեպիսկոպոս Արամ Աթեշյանը: Նա հյուրանոցի համարում մի փոքր հանգստանալուց հետո այցելել է Վանի հոգեւոր խորհուրդ, որի մուտքի մոտ նրան վարդ է նվիրել Վանի հոգեւոր խորհրդի առաջնորդ Նիմեթուլլահ Արվասը:
Աթեշյանը Արվասին է նվիրել «Հայերի դերը օսմանյան կայսրության առողջապահության ոլորտում» Արսեն Յարմանի աշխատությունը:
Նիմեթուլլահ Արվասը պատասխան ընծա է մատուցել Աթեշյանին, նվիրելով Վանում օգտագործվող թեյ պատրաստելու համար նախատեսված «սամովար»:
Աթեշյանը նշել է, թե Աղթամարի վերաբացումը պատարագների համար, շատ կարեւոր իրադարձություն է, քանի որ այն մեծ նշանակություն է ունեցել հայության հոգեւոր կյանքում:
Նա ընդգծել է, որ Աղթամարի Ս.Խաչում պատարագ մատուցելու թույլտվությամբ իրականացվեց իրենց երազանքը, քանի որ 1915-ից այս կողմ նման բան չի իրականացվել: Աթեշյանն անդրադառնալով սպասվող պատարագին հայության մասնակցության խնդրին, նշել է, թե խաչ չտեղադրելու հետ կապված իրենց ավելի վաղ արած կանխատեսումները չեն իրականանա: Ըստ Աթեշյանի՝ պատարագին մասնակցելու համար մեծ ակտիվություն են ցուցաբերում պոլսահայերը:
Հիշեցնենք, որ սեպտեմբերի 19-ին Աղթամարի Սուրբ Խաչ եկեղեցում առաջին անգամ պատարագ է մատուցվելու: Թեեւ թուրքական կողմը նախապես խոստացել էր մինչ պատարագը խաչ տեղադրել եկեղեցու գմբեթին, սակայն հետո հայտարարեց, որ չի հասցնում դա անել եւ խաչը կտեղադրվի պատարագից հետո: Սա առիթ դարձավ, որ Մայր Աթոռ սուրբ Էջմիածինը, Մեծի տանն Կիլիկիո կաթողիկությունն ու Երուսաղեմի պատրիարքությունը հրաժարվեն պատարագին մասնակցությունից: