Թուրքիայի ոստիկանական ուժերը Աղթամարի սուրբ խաչ եկեղեցում տեղի ունեցող պատարագից առաջ իրականացնում են անվտանգության համապատասխան միջոցառումներ: Ինչպես հայտնում է թուրքական Tumgazeteler-ը, անվտանգության միջոցառումներն իրականացվելու են ավելի քան 500 ոստիկանական հագուստով մարդիկ, իսկ քաղաքացիական հագուստ կրող մոտ 50 ոստիկան անվտանգության հետ կապված աշխատանքներ կիրականացնի բազմության մեջ: Ռումբեր եւ ականներ որոնող հատուկ շների միջոցով ամբողջ կղզով մեկ իրականացվում են որոնողական աշխատանքներ:
Արագ արձագանքման ծառայությունն` իր ողջ տեխնիկական ու բժշկական կազմով, հեևրթապահում է Աղթամարում: Կրոնական արարողությունը պետք է իրականացնի Պոլսո Հայոց պատրիարքի փոխանորդ արքեպիսկոպոս Արամ Աթեշյանը: Պատարագին կհետեւեն ավելի քան 180 տեղական եւ արտասահմանյան լրատվամիջոցներ:
Նշենք, որ պատարագին մասնակցում է միայն Պոլսո Հայոց պատրիարքարանը: Հոգեւոր մյուս կենտրոնները` Մայր Աթոռ Սուրբ Էջմիածինը, Երուսաղեմի պատրիարքարանն ու Մեծի Տանն Կիլիկիո կաթողիկոսությունը հրաժարվել են մասնակցել միջոցառմանը: Պատճառը եկեղեցու գմբեթին խաչ չտեղադրելու հանգամանքն է:
Հարկ է նշել, որ նույն պատճառով կրոնական արարողությանը հրաժարվել են մասնակցել նաեւ հայ քաղաքացիական հասարակության շատ ներկայացուցիչներ, չնայած նրանց Թուրքիայի վարչապետն անձամբ է հրավիրել պատարագին: Քաղաքացիական հասարակության ներկայացուցիչները հայտարարել են, որ քանի դեռ եկեղեցու գմբեթին խաչ չի տեղադրվել, եկեղեցին վերականգնված համարել չի կարելի: