Գերմանիայի ԱԳ նախարար Գվիդո Վեսթերվելը Եվրոպական միությանը կոչ է արել վերադառնալ Թուրքիայի՝ Եվրոպական միությանն անդամակցելու հարցի քննարկմանը։ Նրա խոսքով, Եվրոպան պետք է արձագանքի Թուրքիայում անցկացված սահմանադրական բարեփոխումներին։ Այս մաիսն գրում է The Wall Street Journal պարբերականը։
«Մենք չպետք է նեղացնենք շատ ջանքեր գորադրող Թուրքիային՝ նրա առջեւ փակելով ԵՄ-ի դռները։ Թուրքիան առաջ է շարժվում ճիշտ ուղղությամբ։ Սա ցույց է տալիս, որ նա գնում է դեպի եվրոպական ապագա»-հայտարարել է նա։
The Wall Street Journal պարբերականը նշում է նաեւ, որ Վեսթերվելեի կոչերը կարող են հակամարտություն առաջացնել իր եւ եվրոպական այլ երկրների շատ պաշտոնյաների հետ, որոնց սրտով չէ մահմեդական երկրի անդամակցումը ԵՄ-ին։
Պարբերականն ընդգծում է, որ Թուրքիայի ԵՄ անդամակցելու հարցում հիմնական ընդդիմախոսները Ֆրանսիան եւ Ավստրիան են։ Բացի այդ, արտգործնախարարի հայտարարությունը կարող է կրկին լարվածություն առաջ բերել իր եւ Գերմանիայի կանցլեր Անգելա Մերկելի միջեւ, որը եւս դեմ է Թուրքիայի ԵՄ անդամակցությանը:
