Ավելի շատ հայեր կայցելեին Վան՝ մասնակցելու սեպտեմբերի 19-ին կայանալիք պատմական պատարագին, եթե խաչի հետ կապված վեճը լուծված լիներ, եւ հարեւան երկրների միջեւ սահմանը բաց լիներ, գրում է թուրքական Today’s Zaman-ը:
«Եթե սահմանը բաց լիներ, Հայաստանի բոլոր հայերը այստեղ կլինեին»,- ասել է Քայան Սոյաքը՝ Բիզնեսի զարգացման հայ-թուրքական խորհրդի համահիմնադիրն ու համանախագահը: Ինչ վերաբերում է խաչի խնդրին, Սոյաքը նշել է, որ Հայաստանի հայերը չէին հասկանում, թե ինչու խաչը պատշաճ կերպով չի տեղադրվել եկեղեցու վրա:
«Նրանք մտածում էին, որ թուրքական կառավարությունը դեմ է խաչի տեղադրմանը: Մենք ձգտել ենք բացատրել ինչպես հայկական սփյուռքին, այնպես էլ Հայաստանին, որ դա այդպես չէ»,- ասել է նա:
«Եթե գմբեթին խաչ լիներ, Հայաստանից ավելի շատ մարդ կայցելեր: Անգամ այժմ Հայաստանից երեք ավտոբուս էր եկել: Իրենք էլ էին ասում, որ խաչի պատճառով քիչ են եկել»,- ասում է Արիս Նալչըն՝ «Ակոս» թերթի խմբագիրը:
«Մոմի զոհաբերություն» անունով արկղում հայերը 10 հազար լիրա կամ մոտ 6700 դոլար են թողել: Թաթուլ Անուշյանը՝ Հայ առաքելական եկեղեցու Պոլսո պատրիարքարանի հոգեւոր խորհրդի նախագահն այդ գումարը հանձնել է Վանի նահանգապետի օգնական Մուրադ Ուզունփարքային՝ Վանում դպրոց կառուցելու համար: