Թուրքիան եւ Իսրայելը դեռեւս վերջնականապես համաձայնության չեն եկել հարաբերությունների կարգավորման հարցում։ Այս մասին լրագրողներին ասել է Թուրքիայի նախագահի պաշտոնական ներկայացուցիչ Իբրահիմ Քալընը, փոխանցում է ՏԱՍՍ-ը։
«Թուրքիան ի սկզբանե սահմանել էր հայտնի շրջանակները։ Ներողություն էր ստացել, պայմանավորվածություն կա փոխհատուցում վճարելու մասին։ Սակայն երրորդ թեման Գազայի հատվածի բնակչության կյանքի պայմանների վերականգնումն է։ Եվ այդ առումով մենք ի սկզբանե համառ ենք եղել։ Պաղեստինի շրջափակումը պետք է հանել եւ դադարեցնել 49-ամյա օկուպացիան»,- ասել է նա։
Քալընը հայտնել է, որ շրջափակման հանման հարցով երկու երկրների միջեւ շփումները դեռ շարունակվում են։ «Երբ այդ թեման կարգավորվի, մենք կմտնենք համաձայնության կնքման փուլ» ,- ասել է նա։
Հիշեցնենք, որ 2010թ. մայիսին Իսրայելը գրավել էր թուրքական «Մավի Մարմարա» նավը, որը Թուրքիայից հումանիտար օգնություն էր հասցնում Գազայի հատված։ Դրանից հետո հարաբերությունները երկու երկրների միջեւ չեն վերադարձել նախկին մակարդակին։
