Թուրքիայի Դիարբեքիրի Սուրի շրջանում գտնվող հայկական Սուրբ Կիրակոս եկեղեցու հիմնադրամը պատրաստվում է դատական հայց ներկայացնել՝ չեղյալ համարելու եկեղեցին պետականացնելու որոշումը։
Ինչպես տեղեկացնում Ստամբուլի հայկական «Ակոս»-ը, Թուրքիայի նախարարների խորհրդի որոշմամբ Սուրի շրջանում գտնվող բոլոր շինությունները, այդ թվում հայկական Սուրբ Կիրակոս եկեղեցին իբր պահպանության նպատակով պետականացվել էր։ Հայ համայնքին պատկանող Սուրբ Կիրակոս եկեղեցու հիմնադրամն ուսումնասիրում է պետականացման որոշումը եւ պատրաստվում է սահմանված ժամկետում նախարարների խորհրդի որոշումը չեղյալ համարելու համար դիմել դատարան։
Սուրի շրջանում գտնվող ասորական եւ բողոքական եկեղեցիների փաստաբաններն արդեն դիմել են դատարան՝ պնդելով, որ եկեղեցիները հիմնադրամների սեփականություն եւ չպետք է պետականացվեին։
Նշենք, որ Թուրքիայի նախարարների խորհրդի որոշումով Դիարբեքիրի Սուրի շրջանում գտնվող բոլոր կառույցները, այդ թվում Դիարբեքիրի Սուրբ Կիրակոսը, պետականացվել են։
Մերձավոր Արեւելքի ամենամեծ եկեղեցիներից մեկի՝ Սուրբ Կիրակոսի վերաբացումն ու օծումը տեղի է ունեցել 2011- հոկտեմբերի 22-ին, իսկ առաջին պատարագը մեկ օր անց՝ հոկտեմբերի 23-ին:
Սուրբ Կիրակոսի վերանորոգումը իրականացվել է դիարբեքիրցի հայերի եւ Դիարբեքիրի քաղաքապետարանի աջակցությամբ:
Սուրբ Կիրակոսը վերաբացվել է որպես գործող եկեղեցի:
