Գյումրիում շարունակվում է Ավետիսյանների ընտանիքի սպանության գործով դատավարությունը: Նիստը, ինչպես դրան նախորդողները, սկսվեց զգալի ուշացումով:
Դատարանն արդեն հարցաքննել է վկաներին, բացառությամբ ռուսական ռազմակայանի մի քանի նախկին աշխատակիցների, որոնց հասցեները դատարանը չի կարողացել ճշտել: Դատարանը ուսումնասիրել է գործի նյութերը, իրեղեն ապացույցները:
Սպասվում է, որ այսօր կհարցաքննվի ամբաստանյալ Վալերի Պերմյակովը, կամ կցուցադրվեն նախաքննության ընթացքում նրա հարցաքննության տեսագրությունները:
Ավելի վաղ հայտնել էինք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով: